Астана қаласында «Орталық Азия – Қытай 2025» атты алғашқы Өңірлік энергетикалық форум аясында Қазақстан мен Қытай арасында бірқатар ынтымақтастық келісімдері жасалды.
Негізгі құжаттардың бірі – Қазақстан Республикасы Энергетика министрлігі мен Huawei Technologies Kazakhstan компаниясы арасындағы өзара түсіністік туралы меморандум болды. Бұл құжат энергетика саласын цифрлық трансформациялау және оның киберқауіпсіздігін нығайтуға бағытталған. Меморандум аясында Қазақстан Республикасының мұнай-газ, тау-кен және электр энергетикасы салаларында цифрландыру бойынша бірлескен инновациялық жобаларды іске асыру көзделіп отыр. Тараптар энергетикалық жүйенің энергия тиімділігін, экологиялық тазалығын және сенімділігін арттыру үшін жасанды интеллект (ЖИ) пен үлкен деректер технологияларын қолдануға ниетті. Сондай-ақ келесі буындағы телекоммуникациялық және бұлттық инфрақұрылымды дамыту, заттар интернеті, киберқауіпсіздік және нысандардың цифрлық егіздері бойынша шешімдерді енгізу жоспарланып отыр. Ерекше назар «Grid-Forming» энергия сақтау жүйелері жобаларына аударылған: Huawei бұл инновациялық шешімдерді тиімді енгізу үшін өз технологиялары мен сараптамасын ұсынады.
Келісімді іске асыру аясында тараптар Энергетика министрлігі жанындағы Цифрлық трансформациялау кеңсесінде бірлескен жұмыс тобын құрады. Бұл топ энергетика саласының қазіргі жағдайына талдау жасап, цифрлық инфрақұрылымды дамыту және 2025–2028 жылдарға арналған энергетикалық желілердің қажеттіліктері мен сапасы бойынша болжамдық талдамалық ақпаратты әзірлеумен айналысады. Бұл үшін Big Data, IoT және ЖИ технологиялары қолданылады. Жұмысты үйлестіру мақсатында екі тарап өкілдері арасында апталық негізде деректер алмасу жүйесі жолға қойылады.
«Бүгін қол қойылған меморандум Қазақстан үшін энергетика саласын сапалы жаңғыртуға жаңа мүмкіндіктер ашады. Озық технологияларды бірлесіп қолдану желілеріміздің сенімділігі мен тиімділігін арттырып, саланың тұрақты дамуына ықпал етеді», – деді ҚР Энергетика министрі Ерлан Ақкенженов.
«Huawei компаниясы Қазақстанмен ынтымақтастық орнатқанына қуанышты және елдің энергетика секторын жаңғыртуға өз үлесін қосуға дайын. ЖИ, үлкен деректер мен бұлттық технологиялар саласындағы тәжірибеміз жаңа буындағы интеллектуалды желілерді құруға көмектесіп, Қазақстанның «жасыл» және цифрлық энергетикаға көшуін жеделдетеді», – деп мәлімдеді Huawei Technologies Kazakhstan компаниясының бас директоры Сун Ясюй.
Тараптар меморандум Қазақстан энергетика саласының цифрлық трансформациясын жеделдетудің негізін қалайды деп атап өтті. Құжат инновацияларды енгізу мен желілердің тұрақтылығын арттыруға жаңа мүмкіндіктер ашады. Серіктестік саладағы ұзақ мерзімді және тұрақты даму ұмтылысын білдіреді. Бірлескен бастамалар Қазақстанның энергетикалық жүйесіне бейімделген халықаралық тәжірибелерді енгізуге жол ашады. Huawei технологиялық көшбасшы ретінде елдің негізгі инфрақұрылымдарын цифрландыруды қолдауды жалғастырады.
Сіз жаңалықтар туралы не ойлайсыз