Қазақстанда көктем келгеннен кейін дәстүрлі түрде құрылыс маусымы басталады. Адамдар күзге дейін жұмысты аяқтап үлгеру үшін құрылыс материалдарын сатып ала бастайды, шеберлерді іздейді, техника жалдайды. OLX аналитикалық қызметінің 2025 жылғы көктемге арналған деректері бойынша, құрылыс тақырыбына қызығушылық айтарлықтай артқан: пайдаланушылар хабарландыруларға белсендірек жауап беріп, жаңа ұсыныстар орналастырып, іздеуді қажетті санаттар бойынша сүзгілейді.
Өңірлер арасында құрылыс қызметтеріне сұраныс бойынша Алматы облысы сөзсіз көш бастап тұр — мұнда 75 мыңнан астам жауап тіркелген. Бұл көрсеткіш белсенділік бойынша екінші тұрған Түркістан облысымен (шамамен 23,5 мың) салыстырғанда үш есе жоғары. Одан кейін Ақмола (21 мың), Ақтөбе, Қарағанды және Жамбыл облыстары орналасқан. Ел бойынша белсенділіктің өсуі маусымдық жұмыстардың барлық аймақтарда басталғанын көрсетеді.
Экономикалық ахуалдың өзгеруіне ең сезімтал салалардың бірі саналатын құрылыс сегменті күтілгеннің керісінше — өсім көрсетіп отыр. OLX аналитикасына сәйкес, ең танымал өнім ретінде құрылыс блоктары алға шыққан. Көктемнің басында бұл санатта 22,8 мыңдай хабарландыру болса, маусым соңына қарай бұл көрсеткіш 42,5 мыңға жуықтаған — бұл 3 ай ішінде 85%-дан астам өсімді білдіреді. Ұқсас серпін «Кірпіш» санатында да байқалады — мұндағы хабарландырулар саны 14 328-ден 25 153-ке дейін көбейген, яғни шамамен екі есеге артқан. Қазақстандықтар генераторлар, тақтайлар, пішінді төсеніш секілді материалдарды белсенді түрде сатып алуда — бұл сегменттердің әрқайсысы 75%-дан 150%-ға дейін өсімді көрсеткен.
Наурыздан мамырға дейін қызметтерге деген сұраныстың өсуі де әсерлі. Көктем соңында жарияланған хабарландырулар саны наурызбен салыстырғанда екі есе артса, жауаптар саны орта есеппен 62%-ға көбейген. Сонымен қатар, бір хабарландыруға шаққандағы орташа жауап саны сәл төмендеген: наурызда бір хабарландыруға шамамен 7–8 жауап келсе, сәуірде бұл көрсеткіш 5–6 аралығында болған. Бұл көрсеткіш көктемде орындаушылар тарапынан ұсыныстың, ал тапсырыс берушілер тарапынан сұраныстың айтарлықтай артқанын көрсетуі мүмкін. OLX пайдаланушылары жөндеу және құрылыс саласындағы мамандарды белсенді түрде іздейді, ал шеберлер мен мердігерлер өз ұсыныстарын дер кезінде орналастырады. Нарықтағы мұндай жандану көптеген қазақстандықтардың құрылыс маусымын ертерек бастауға дайындалып жатқанын аңғартады. Бұл, өз кезегінде, ауа райының жақсаруы мен саяжай маусымының басталуымен құрылыс-жөндеу қызметтеріне деген сұраныстың дәстүрлі түрде өсетінін көрсетеді.
Бұл деректер еліміздің оңтүстік және орталық аймақтарында жөндеу мен құрылысқа қатысты тапсырыстардың шоғырлануы жоғары екенін көрсетеді. Бұл өңірлерде жекеменшік құрылыстар қарқынды дамып, маусымдық жұмыстар ерте басталады.
Хабарландыру белсенділігі төмен өңірлерде де наурыз айымен салыстырғанда оң динамика байқалады. Бұл бүкіл ел бойынша құрылыс маусымының басталғанын және мамандарға деген сұраныстың артып жатқанын білдіреді. Адамдар жөндеу жұмыстарын, саяжай мен тұрғын үйді жаңғырту жоспарын құра бастайды, мердігерлер мен жұмысшыларды іздейді. Әсіресе әртүрлі бағытта жұмыс істей алатын әмбебап шеберлер — әрлеуден бастап электрмонтаж жұмыстарына дейін орындай алатын мамандар жоғары сұранысқа ие.
Қазіргі өсім қарқынына қарап, жаз мезгілінде құрылыс және жөндеу саласындағы белсенділік одан әрі артады деп күтуге болады. Мамыр айында құрылыс қызметтеріне деген сұраныс айтарлықтай артты, және бұл үрдіс бәсеңдейді деуге еш негіз жоқ. Керісінше — күн жылынып, жауын-шашын азайған сайын тапсырыстар саны көбейе түседі, әсіресе маусым ерте басталатын оңтүстік өңірлерде. Үйін жаңартқысы, саяжайды жақсартқысы, күрделі жөндеу жүргізгісі келетіндер саны артуда. Осындай сұраныс аясында білікті мамандарға деген бәсекелестік күшейіп келеді. Көптеген орындаушылар жұмыс күндерін бірнеше апта алға брондап қояды, сондықтан бос бригаданы табу қиындай түседі. Сол себепті ірі немесе шұғыл жұмыстарды жоспарлап отырғандар іске ертерек кіріскенді жөн көреді — мердігерді неғұрлым ертерек тапса, сапалы нәтиже алып, жобаны уақытында аяқтау мүмкіндігі соғұрлым жоғары. Көктемнің соңы — мамандардың жүктемесі артып кетпей тұрып, іске кірісуге ең қолайлы уақыт.
Сіз жаңалықтар туралы не ойлайсыз