Қазақстандық студенттер әлемдік аренада өздерін сенімді түрде көрсетті: Шэньчжэнь қаласында өткен ең ірі халықаралық байқау — Huawei ICT Competition 2024–2025 финалында еліміздің үш командасы алтын, күміс және қола жүлделерді жеңіп алды.
Huawei ICT Competition — әлемдегі ең ауқымды ІКТ жарыстарының бірі. Биыл бұл байқауға 100-ден астам елдің 2000-нан астам жоғары оқу орны мен колледжінен 210 000-нан астам студент пен оқытушы қатысты. Жаһандық финалға 48 ел мен өңірден 179 команда шығып, Network, Cloud және Computing бағыттары бойынша, сондай-ақ бағдарламалау мен инновациялық шешімдер категорияларында бақ сынады.
Қазақстан атынан қатысқан үш команда да халықаралық мойындауға ие болып, ІКТ саласында мансап құруға ұмтылатын мыңдаған студент үшін шабыт беретін үлгіге айналды.
- Network Track санатында 1 орын — Виктория Калашникова (ҚБТУ), Дамир Абдуганиев (АЭжБУ), Искандер Сағынбек (ҚБТУ).
- Computing Track санатында 2 орын — Тахмина Шалбай (AIU), Закир Даулбаев және Аманжан Сабырғали (екеуі де — АЭжБУ).
- Cloud Track санатында 3 орын — Анида Миталипова (Astana IT University), Жансұлу Күнтас (ҚазҰУ), Руслан Таңатар (Yessenov University).
Жеңімпаздарды Қазақстанның Қытайдағы елшілігінің кеңесшісі Болат Үсенов жеке өзі құттықтады. Ол студенттермен кездесіп, цифрлық мамандықтардың дамуын талқылап, дипломатиялық тәжірибесімен бөлісті. Жабылу салтанатында дәл сол кісі Network Track санатында бірінші орын алған командаға марапат табыстады.
Финал аясында жасанды интеллекттің білім беру саласындағы рөліне арналған халықаралық AI Accelerating Education Transformation Summit саммиті де өтті. Қазақстан атынан саммитке ҚР Жоғары білім және ғылым министрлігі жанындағы Ғылым қорының өкілі Айгүл Ізденова қатысып, AI-ны білім беру бағдарламаларына біріктіруге, жастар арасында инновацияларды дамытуға және салалық АИ жобаларын жасауға бағытталған AI-SANA ұлттық жобасын таныстырды.
«AI-SANA — бұл болашаққа жасалған қадам. Онда қазақстандық студенттер технологияны тұтынушылар ғана емес, оның жасаушылары ретінде танылып отыр. Олар елімізді әлемдік деңгейде лайықты түрде таныстырды, біз бұған мақтанамыз», — деп атап өтті Айгүл Ізденова.
Қазақстандық студенттердің бұл жетістігі елімізде жоғары оқу орындары мен оқытушылардың белсенді қатысуымен жүзеге асырылып жатқан Huawei ICT Academy бағдарламасының нәтижесінде мүмкін болды.
«Бұл жеңіс — жүйелі жұмыстың жемісі. Біз жастардың ең үздік халықаралық мүмкіндіктерге қол жеткізе алатын экожүйені қалыптастырып жатырмыз. Бұл тек бастамасы ғана», — деді Huawei компаниясының Қазақстандағы таланттар экожүйесін дамыту жөніндегі менеджері Жазира Камашбек.
«Біздің студенттер күрделі тапсырмалар мен қатаң бәсекеге қарамастан барлық сынақтардан абыроймен өтті. Олар Қазақстанның цифрлық болашағын құруға толық дайын», — деп атап өтті Network Track командасының нұсқаушысы Темірлан Жақсалықов.
Сонымен қатар, Huawei компаниясы Huawei ICT Academy Intelligent Platform платформасында жасанды интеллектті енгізетінін хабарлады. Бұл жаңашылдық студенттер мен оқытушылар үшін оқуды тиімді әрі қолжетімді етуге мүмкіндік береді. Бұл — білім беруді цифрландыру бағытындағы маңызды қадам.
Huawei ICT Competition туралы толығырақ ақпарат сілтеме бойынша қолжетімді: https://www.huawei.com/minisite/ict-competition-2024-2025-global/en/index.html
Сіз жаңалықтар туралы не ойлайсыз