Соңғы жылдары дәрігерлер сүт безі обырына жас әйелдер арасында шалдығу жағдайларының жиілегенін атап өтуде.
Бұрын бұл ауру 40 жастан асқан әйелдерге тән деп есептелсе, бүгінде ол жиі 25 пен 35 жас аралығындағы науқастардан анықталып отыр.
Бұл – алаңдатарлық үрдіс, ерте диагностика мен тұрақты профилактикалық тексерулердің маңыздылығын айқын көрсетеді.
Сүт безі обыры – Алматы қаласында әйелдер арасында ең жиі кездесетін онкологиялық аурулардың бірі.
2024 жылы Алматы онкологиялық орталығында скрининг бағдарламасы аясында 95 мыңға жуық әйел тексеруден өтті.
Олардың 209-ынан онкологиялық ауру анықталды, оның ішінде 47%-ы – алғашқы, ерте сатыда.
Бұл дер кезінде жүргізілген тексерудің емделу мүмкіндігін және толық айығу ықтималдығын едәуір арттыратынын көрсетеді.
Дәрігерлер ерекше атап өтеді: профилактикалық тексерулер адам өмірін сақтап қалуы мүмкін.
«Скрининг ауруды симптомдары пайда болмай тұрып анықтауға көмектеседі, бұл кезде емдеу жеңіл әрі тиімді өтеді. Қазақстанда барлық скрининг бағдарламалары мемлекеттік медициналық көмек аясында тегін жүргізіледі, оның ішінде Алматы онкологиялық орталығында да», — дейді Қалымбетова Балзия Сұбыханқызы.
Дәрігерлер әйелдерге маммологқа баруды кейінге қалдырмауға кеңес береді, себебі көбінесе аурумен күресте шешуші рөлді ерте диагностика атқарады.
Қазақстанда ұлттық скрининг 40 жастан басталғанымен, онкомаммологтар 30 жастан, ал қауіп факторлары болған жағдайда 25 жастан бастап маммологқа тұрақты тексеруден өтуге кеңес береді.
Қауіп факторларына мыналар жатады:
🔹 Жақын туыстарында сүт безі обырының болуы
🔹 Бұрынғы ота немесе сүт бездеріндегі түзілістер
🔹 BRCA1 және BRCA2 гендерінің мутациясы
Бұл жағдайларда дәрігерлер жыл сайын маммологқа көрінуді және УДЗ (ультрадыбыстық зерттеу) жасауды ұсынады.
Мамандар көп әйелдердің өзін-өзі тексеру әдісін білмейтінін, және қауіпті өзгерістерді байқамауы мүмкін екенін еске салады. Сондықтан кәсіби тексеру гинекологқа бару секілді тұрақты әдетке айналуы тиіс.
Алматыда сүт безі обыры әйелдер арасындағы онкологиялық аурулардың көшін бастап тұр. Сондықтан денсаулыққа уақытында мән беру – өмірді сақтаудың кепілі.
Сіз жаңалықтар туралы не ойлайсыз