Алматы қаласындағы №7 Қалалық клиникалық ауруханада шаттың алдыңғы қабырғасы жыртылған 30 жастағы науқасқа күрделі реконструкциялық операция сәтті өтті.
Аурухана баспасөз қызметінің дерегіне сүйенсек, келіншек дәрігерге бармай ауруын әбден асқындырып алған. Өзінің айтуынша, үлкен дәретін ұстай алмағандықтан ел қатарлы өмір сүре алмаған және күйеуімен жақын қарым-қатынасына да кері әсер еткен.
«Науқас бізге алғашқы симптомдар пайда болғаннан кейін он айға жуық уақыттан соң бір-ақ келді. Үнемі үлкен дәреті шығып кете берген соң ол дұрыстап тамақтана да алмаған. Бұл жағдай оның күнделікті өмірде де, жеке өмірінде де өзін жайлы сезінуіне мүмкіндік бермегер», — дейді Алматыдағы №7 қалалық клиникалық аурухананың проктология бөлімшесі меңгерушісі Марат Қаленбаев.
Міндетті медициналық сақтандыру бағдарламасы бойынша жоспарлы госпитализациядан, тексеруден және дайындықтан кейін тәжірибелі дәрігерлер жас келіншекке аса күрделі ота жасап, оның денсаулығын қалпына келтірді. Науқасқа реконструктивтік пластикалық операция жасалды: хирург мамандар тік ішек пен жыныс мүшесі арасына каркас қалыптастырып, сфинктердің анатомиялық тұтастығы мен функцияларын қалпына келтірді. Ауруханада 19 тәулік жатып, сауыққаннан кейін науқас отбасына оралды.
Дәрігердің айтуынша, осыған ұқсас шағымдарымен көмекке жүгінетін әр түрлі жастағы науқастар көбейіп бара жатыр. Бірақ көпшілігі дәрігерге қаралмай жылдар бойы проктологиялық патологиялармен жүре береді. Егер тік ішек жұмысында қандай да бір қиындықтар немесе ауырсыну белгілері пайда болса дереу дәрігерге қаралу қажет, дейді проктолог дәрігер.
«Көптеген науқастар проктолог дәрігер көмегіне жүгінуге ұялады. Бізге ауруы асқынып, ауыр жағдайға душар болғаннан кейін ғана келетіндео көп. Мысалы, жақында біз 50-60 жас аралығындағы үш әйелге ота жасадық. Бәрінің де ауруы асқынып кеткен. Дәрігерге дер кезінде қаралса хирургиялық ем жасалып, жамбас функцияларын толық қалпына келтіруге болады. Қазіргі медицинада тиімді емдеу әдістері көп. Сондықтан жұртшылықты өзін-өзі емдеумен айналыспай, қандай да бір жайсыздық мазалаған жағдайда бірден проктолог мамандарға қаралуға шақырғым келеді»,- деп түйіндеді маман.
Сіз жаңалықтар туралы не ойлайсыз