Энергетикалық сусындар лезде сергітеді. Алайда оның құны қандай? Алматы Қалалық кардиологиялық орталығының кардиохирургі Ақнұр Арыстанова бұл сусындарды үнемі тұтыну жүрек-қантамыр жүйесіне айтарлықтай зиян келтіруі мүмкін екенін ескертеді.
Көптеген энергетиктің басты компоненті — кофеин. Ол таурин, гуарана және қантпен біріге отырып, жүйке мен жүрек-қантамыр жүйесін ынталандырып, ағзаны жұмыс істеуге мәжбүрлейді. Соның салдарынан қан қысымы жоғарылап, жүрек соғысы жиілейді, тамырларға артық жүктеме түседі.
Мұндай сусынды үнемі ішу гипертонияға, созылмалы шаршауға және тіпті ауыр жүрек ауруларына әкелуі мүмкін.
«Энергетиктер әсіресе жүрек-қантамыр ауруларына бейім жандар үшін аса қауіпті. Кофеиннің жоғары мөлшері аритмия туындатуы мүмкін, ал қанның қоюлануы тромбоз қаупін арттырады. Бұл инфарктке не инсультке әкелуі ықтимал», — деп түсіндірді Ақнұр Арыстанова.
Жақында Алматы Қалалық кардиологиялық орталығында болған оқиға энергетикті шамадан тыс тұтынатындар үшін дабыл боларлық жағдай болды. Дәрігерлер жүрек соғысының бұзылуы, қатты ентігу және әлсіздік белгілерімен түскен 31 жастағы пойыз жолсерігін қабылдады. Оның жүрегі қалыптан тыс ырғақпен соғып, жалпы жағдайы алаңдатарлық еді. Тексеру барысында науқастан кеңейген кардиомиопатия — жүрек бұлшықетінің созылып, қанды толықтай айдай алмауымен сипатталатын ауыр дерт анықталды. Белгілі болғандай, ер адам күн сайын ойланбастан 5-6 банка энергетикалық сусын ішкен екен. Кофеин мен стимуляторлардың шамадан тыс мөлшерде, ұзақ уақыт бойы ағзаға әсер етуі жүрек бұлшықетінің әлсіреуіне себеп болған. Дәрігерлер шұғыл ем жүргізіп, науқастың жағдайын тұрақтандырды. Алайда кеңейген кардиомиопатия — өршуі мүмкін, ауыр жағдайда жүрек трансплантациясын қажет ететін созылмалы ауру.
Дәрігер гипертониясы және жүрек ауруы бар адамдарға энергетикалық сусыннан мүлде бас тартуға кеңес береді. Себебі кофеиннің жоғары мөлшері олардың жағдайын ушықтыруы мүмкін. Сондай-ақ бұл сусындар мазасыздықтан зардап шегетіндер үшін де қауіпті, өйткені мазасыздықты күшейтіп, дүрбелең ұстамаларын туындатуы мүмкін. Жасөспірімдер мен жастар да қауіп тобына жатады, себебі олардың жүрек-қантамыр жүйесі әлі толық қалыптаспаған, сондықтан мұндай шамадан тыс жүктемеге аса сезімтал келеді.
Ағзаны кофеин мен қант арқылы жасанды ынталандырудың орнына, сергектікті табиғи жолмен арттырған дұрыс. Контрасты душ сергектік сыйлап, қан айналымын жақсартады. Далада серуендеу — қанды оттегімен қанықтырып, энергия деңгейін табиғи жолмен көтерудің бір тәсілі. Ал жеткілікті ұйқы — ағзаны қалпына келтірудің ең тиімді жолы. Сонымен қатар лимон немесе жалбыз қосылған шай жүрекке зиян келтірмей, жеңіл қуат береді.
«Энергетиктер қысқа мерзімді сергектік әсерін бергенімен, денсаулыққа елеулі зиян келтіруі мүмкін. Жүрегіңізді күтіңіз — оны артық күйзеліске түсірмеңіз!» — деп түйіндеді Ақнұр Арыстанова.
Сіз жаңалықтар туралы не ойлайсыз