Бүгін SDU University аумағында жаңа SDU & Freedom жасанды интеллект блогының ашылу салтанаты өтті. Бұл маңызды жоба еліміздегі инженерлік және IT білімін дамытуға серпін беріп, болашақ мамандарға жаңа мүмкіндіктер ашпақ.
Ашылу рәсіміне Қазақстан Республикасының Ғылым және жоғары білім министрі Саясат Нұрбек, Freedom Holding Corp. компаниясының бас атқарушы директоры Тимур Турлов, Алматы облысының әкімінің бірінші орынбасары Әбдірахым Нұрлан Ерғалиұлы қатысты.
Жаңа блок Freedom Holding Corp. компаниясының «Freedom Шапағат» қайырымдылық қорының демеушілігімен салынды. Жалпы аумағы 5,6 мың шаршы метр болатын ғимаратта жасанды интеллект технологияларын дамытуға және қаржылық сауаттылықты арттыруға арналған зертханалар орналасқан.Мұнда интерактивті орталық құрылып, студенттер Freedom Academy сарапшыларынан инвестициялау және трейдингтің негізгі қағидаларын үйрене алады. Сонымен қатар, университеттің жаңа блогы финтех-инновациялар және басқа да іргелес салалар бойынша зерттеу жұмыстарын жүргізуге арналған хабқа айналуы тиіс, жаңа ғимарат түрлі бағыттағы тақырыптық іс-шаралар, конференциялар мен семинарлар өткізуге мүмкіндік береді. Мұнда тек сапалы білім алуға ғана емес, сондай-ақ жайлы демалыс аймақтарын құруға да жағдай жасалған.
Тимур Турлов, Freedom Holding Corp. компаниясының бас атқарушы директоры:
«SDU University-де жасанды интеллект бойынша жеке блоктың ашылуы заманауи технологияны зерттеу, дамыту және қолдану саласында жаңа деңгейге көтерілуге мүмкіндік береді, сондай-ақ еліміздің экономикасы үшін үлкен маңызға ие. Бұл жобаға біздің қолдауымыз – жай ғана инфрақұрылымға салынған инвестиция емес, ертең әлемді өзгертетін жас таланттарға жасалған инвестиция. Біз технологияның күшіне және Қазақстанның ғаламдық цифрлық трансформацияда атқара алатын рөліне сенеміз. «
Шара лента қию рәсімімен басталып, қонақтар жаңа нысанның мүмкіндіктерімен танысты.
Саясат Нұрбек, ҚР Ғылым және жоғары білім министрі:
«Жасанды интеллект блогының құрылуы – еліміздің зияткерлік әлеуетін қалыптастырудағы маңызды қадамдардың бірі болып табылады, және бұл SDU University үшін үлкен жетістік. Бұл жоба студенттер мен зерттеушілерге болашақ технологияларын терең зерттеу және қолдану үшін жаңа мүмкіндіктер ашады. Мемлекет ғылым мен білімді дамытуға бағытталған бастамаларды қолдайды, және біз SDU университеті цифрлық технологиялар саласында Қазақстанды алдыңғы қатарға шығаратын мамандарды даярлайтын басты алаңдардың біріне айналады деп сенеміз. Мұнда жаңашыл идеялар мен инновациялық жобалар туындайтынына күмәнім жоқ.»
Бой көтерген жаңа нысан жасанды интеллект мүмкіндіктерін арттыру мен қатар, орын тапшылығы мәселесін де шешіп отыр. Жыл сайын студенттер саны артып, білім беру бағдарламаларының қатары толығып келеді. Бүгінде SDU университетінде 9 мыңға жуық студент білім алып отыр.
Әлімжан Игенбаев, SDU University ректоры:
«SDU University – оқу процесі ағылшын тілінде жүргізілетін алғашқы жоғары оқу орындарының бірі. Біз IT, инженерия, педагогика, құқық, әлеуметтік ғылымдар және бизнес салаларында сұранысқа ие мамандарды 30 жылға жуық уақыт дайындап келеміз. Сондықтан халықаралық серіктестермен, академиялық институттармен және бизнес қауымдастығымен ынтымақтастық аясында даму перспективаларын айқын көреміз. Осы орайда, жаңа блок студенттердің әлеуетін арттырып, олардың стартаптарын жүзеге асыруға мүмкіндік беретініне сеніміміз мол. Бұл жаңа нысан – өңіріміздегі білім мен ғылым саласын дамытудағы үлкен қадам деп білеміз».
SDU университетінің жаңа SDU & Freedom блогы – тек оқу орны үшін ғана емес, тұтас Қазақстанның технологиялық дамуына жасалған маңызды қадам. Бұл бастама болашақ мамандарды даярлауда, ғылым мен инновацияны дамытуда маңызды рөл атқарады.
Сіз жаңалықтар туралы не ойлайсыз