Қазақстандық медицина қызметкерлерінің жауапкершілігін кәсіби қателіктерден міндетті сақтандыру бойынша сыйлықақылар көлемі бес ай ішінде 3,3 млрд. теңгені құрады. Түсетін сыйлықақылар, сондай-ақ сақтандыру тәуекелдері Қазақстан Республикасындағы 14 сақтандыру компаниясынан тұратын бірыңғай пулға қатысушылар арасында біркелкі бөлінеді — олардың бірі Jusan Garant болып табылады.
Ірі қазақстандық сақтандырушылар алғаш рет өткен жылдың қазан айында республикада енгізілген медицина қызметкерлерінің жауапкершілігін сақтандыру үшін арнайы пулға бірікті. Бүкіл ел бойынша дәрігерлер сақтандыруға міндетті болды. ҚР Денсаулық сақтау министрлігі ақпан айының соңында полистерді мемлекеттік мекемелердің 97%-нан астамы және жеке медициналық мекемелердің 47%-ы рәсімдегенін хабарлады.
Медицина қызметкерлерінің сақтандыру жүйесіне ең көп тартылуы Ұлытау, Жетісу, Солтүстік Қазақстан, Шығыс Қазақстан (100%), Қостанай (91%), Батыс Қазақстан және Абай (90%) облыстарында қол жеткізілді. Сонымен қатар, денсаулық сақтау министрлігінің деректері бойынша Маңғыстау (30%), Қызылорда (36%), Алматы (49%), Түркістан (51%) облыстары мен Шымкент қаласының (34%) медициналық ұйымдары сақтандырумен төмен қамтылған.
Бес ай ішінде бірыңғай сақтандыру пулына төлем жасауға 10 өтініш келіп түсті. Қазақстандықтар өз өтініштерінде көбінесе Ақмола және Жамбыл облыстарының, сондай-ақ Алматы қаласының мемлекеттік медициналық мекемелеріне шағымданады.
Сақтандыру төлемі пациенттің медициналық қателікке байланысты денсаулыққа келтірілген зиян дәрежесіне байланысты. Өтемақының максималды мөлшерін мемлекет анықтайды. Егер пациентке мүгедектік белгіленбей, залал келтірілген болса, онда емделуге жұмсалған нақты шығыстар өтеледі, бірақ 1,18 млн. теңгеден (300 АЕК-тен) аспайды.
Егер медициналық қателік мүгедектікке әкеп соқтырса, онда төлем жоғарырақ болады. 1-топ мүгедектігі үшін өтемақы 3,14 млн. теңгені (800 АЕК-ті), 2—топ үшін — 2,36 млн. теңгені (600 АЕК-ті), 3—топ үшін — 2 млн. теңгеге жуық (500 АЕК-ті) құрайды, дәл осындай төлем мүгедектігі бар балаға да тиесілі. Науқастың өмірі мен денсаулығына келтірілген залал үшін өтемақы шамамен 12 млн. теңгені (3000 АЕК-ті) құрайды.
Сіз жаңалықтар туралы не ойлайсыз