15 наурыз – «Наурызнама» мерекесі аясында қайырымдылық күні болып есептеледі.
Аталмыш күн қайырымдылық, мейірімділік пен тату көршілікті насихаттауға арналған. Жалпы, игі істер дәстүрін тарату қоғамда қайырымдылық мәдениетін қалыптастыруға ықпал етеді. Наурызнаманы мерекелеу кезінде бұл қасиеттерді барынша кеңінен насихаттау, қадірін арттыру аса маңызды. Ұлы даланың басты құндылықтарының бірі – адамдардың бір-біріне жанашырлық танытып, өзара көмек көрсетуі қоғамды айрандай ұйытып, бір ел, бір халыққа біріктіреді.
Осыған орай, еліміздің бірқатар өңірлерінде «Жаңашыржүрек» республикалық қайырымдылық акциясын аясында түрлі іс-шаралар ұйымдастырылды. Соның ішінде Қостанай қаласы әйелдер-көшбасшылар клубының мүшелері Кәмелетке толмағандарды бейімдеу орталығына барып түрлі сыйлықтармен тәттілер табыстаса Ақмола облысының жастары «Тазалыққа құрмет, жүрекке жылу» атты акциясын ұйымдастырды.
Аталған акция аясында, қаланы тазалықта ұстап жүрген жандарға ыстық шәй мен бауырсақ таратып, бойларын жылытып, көңілдерін көтерді. Бұл іс-шараның басты мақсаты – қоғамдық ортада қала тазалығын қамтамасыз ететін қызметкерлерге алғыс білдіру және оларды ынталандыру.
Жалпы, Ақмола облысы «Волонтерлерді қолдау орталығы» фронт — кеңсесінің ұйымдастыруымен қаңтар айында аудандар бойынша «Ыстық шәй», жалғызбасты қарт кісілердің аулаларында «Қарлы десант» және студенттер арасында «Birgemiz.Bilim» акциялары өткізілген болатын. Сонымен қатар, ақпан айының басынан бастап аталмыш акциялар жалғасып, «Мен донормын», «Сыбайлас жемқорлыққа қарсы күрес» шаралары қолға алынуда.
Сіз жаңалықтар туралы не ойлайсыз