Алматыда Арсен Томскийдің «Inner Drive: Андердогтен жаһандық компанияға дейін» кітабының қазақша нұсқасы таныстырылды. Бұл еңбекте әділетсіздікпен күрес миссиясына негізделген халықаралық технологиялық компанияны құру мен оны жаһандық деңгейге шығарудың стратегиясы егжей-тегжейлі баяндалады.
Кітап бизнеске деген ерекше көзқарастың нарық шектеулерін еңсеруге мүмкіндік беріп, шектеулі ресурстармен әлемдік деңгейдегі компания құруға қалай жол ашқанын көрсетеді.
Қазақстанның алты облысының оқушылары кітапты алғашқылардың бірі болып алады. Батыс Қазақстан, Атырау, Маңғыстау, Қызылорда, Жамбыл және Түркістан облыстарындағы, сондай-ақ Семей, Атырау және Астана қалаларындағы білім беру мекемелерінің кітапханалары кітаптың мұқабасы қатты даналарымен толығады.
1000 данадан тұратын тиражды inDrive компаниясы арнайы сатып алып, оны еліміздің өңірлердегі мектептеріне табыстауды қолға алды. Кітаптарды сыйға беруді «Мазмұндама» баспасы Қазақстан Республикасының Оқу-ағарту министрлігімен бірлесіп жүзеге асырады. Сондай-ақ, кітаптардың бір бөлігі inDrive-тың білім беру саласындағы Beginit жобасына және Satbayev University жанынан ашылатын inVision U факультетіне беріледі. Бұл факультет жұмысын 2025 жылдың қыркүйегінде foundation бағдарламасынан бастайды.
Кітаптың қазақ тіліне аударылуы – жергілікті кітап басу ісін дамыту мен шынайы табыс тарихын кеңінен тарату жолындағы маңызды қадам. Қазақстанда 11 жылдан бері жұмыс істеп келе жатқан inDrive үшін бұл кітап – отандық ІТ-компанияның шынайы мысалға негізделген даму жолын егжей-тегжейлі сипаттайтын сирек еңбектердің бірі.
«Мазмұндама» баспасының негізін қалаушы және директоры Шыңғыс Мұқан: «Соңғы жылдары қазақ тілінде отандық компаниялардың, әсіресе ІТ-сектордағы бизнес тарихына арналған кітаптар әлі де аз. “Inner Drive: Андердогтен жаһандық компанияға дейін” кітабының жарық көруі – жаңа буын кәсіпкерлері мен жаңашыл жандарды шабыттандыратын маңызды оқиға», – деп атап өтті.
Кітапты бизнес, командамен жұмыс және қиындықты еңсеру туралы шынайы әрі мотивациялық баяндау стилі үшін оқырмандар мен сарапшылар жоғары бағалады. Онда компанияның қалыптасу кезеңдері, соның ішінде Қазақстанда іске қосылуы мен дамуы кеңінен баяндалған. Енді бұл басылым қазақтілді оқырмандарға жол тауып, елдегі кәсіпкерлер мен стартап өкілдеріне баға жетпес тәжірибе ұсынады.
Кітап авторы, inDrive компаниясының CEO-сы Арсен Томский: «Мен inDrive тарихының қазақ тілінде жарық көргеніне қуаныштымын. Бұл жай ғана аударма емес, бұл – Қазақстан жастарына, елдің және әлемнің болашақ көшбасшылары мен жаңашылдарына арналған мүмкіндік. Бұл кітап олардың қандай қиын жағдай болмасын, өз қағидалары мен идеяларына адал бола отырып, кез келген биікті бағындырып, әлемге ықпал ете алатынына дәлел», – деді.
Соңғы жылдары Қазақстанда кітап шығару ісіне қызығушылық артып келеді: 2024 жылы Франкфурт кітап жәрмеңкесінде қазақ тіліндегі кітаптар таныстырылды, ал Алматыда халықаралық бестселлерлердің аудармалары шығып, кітап жәрмеңкелері белсенді түрде өтіп жүр.
Сіз жаңалықтар туралы не ойлайсыз