«Қазақстанның Автокөлік Одағы» (ҚАО) мәліметінше қаңтарда 11 252 бірл. жеңіл және коммерциялық автомобиль өтті, бұл былтырғы жылдың алғашқы айымен салыстырғанда 0,1% жоғары нәтиже. Қаңтарда дәстүрлі түрде көлік аз сатылады.
Анар МАҚАШЕВА, ҚАО президенті: «2025 жылдың басында дилерлер клиенттерге барынша көңіл бөлу саясатын ұстанды: көбі түрлі науқандар өткізіп, қолжетімді автокредит бағдарламаларын ұсынды. Тағы бір маңызды тренд дилерлік желінің дамуы мен кеңеюіне инвестиция құю болды. Бұл 2024 жылғы рекордтық цифрлармен де, компаниялардың өз ынтасымен де байланысты. Дилерлік желілер берген ақпаратқа сүйенсек, бәсеке артқандықтан биыл нарықтағы ойыншылардың басым бөлігі қызмет көрсету сапасын жақсартуға және мамандарды дайындауға айрықша мән беруді жоспарлап отыр. Қаржы институттарымен бірлесіп қаржыландырудың шетел нарықтарында танымал механизмдері мен құралдары жасалып жатыр. Мұның бәрі бір ғана мақсат – елдің автопаркін жаңартуға бағытталған».
.
Қаңтар айындағы ең көп сатылған Үздік-10 автомобильдер тізімінің басында Hyundai (3 203 бірл.; былтырғы қаңтармен салыстырғанда +2,8%) тұр. Екінші орын 1191 машинасы өткен Chevrolet еншісінде (+48,3%). Үшінші сатыға жайғасқан Kia-ның 980 моделі иесін тапқан (-20,4%). Төртінші қатарға Chery орналасты (709 бірл.; -34,4%), ал бесінші орынға алғаш рет 660 моделі сатылған Geely тұрақтады (+104,3%). Toyota дилерлері бұл жолы 590 көліктің кілтін тапсырды (+9,5%). Рейтингті Jac (589 бірл.; -21,8%), Jetour (581 бірл.; +3,2%), Haval (580 бірл.; +9,6%) және Changan (372 бірл.; -16,4%) түйіндеді.
Қаңтардағы аса танымал болған Үздік-10 модельдер қатарында тағы Hyundai Tucson (1452 бірл.) көш бастады. Екінші жүлде Chevrolet Cobalt-қа (1113 бірл.) бұйырса, үшінші орынды Hyundai Elantra (571 бірл.) алды. Одан бөлек тізімде Hyundai Santa Fe (473 бірл.), Kia Sportage (460 бірл.), Chery Tiggo 7 (256 бірл.), Jac S3 (247 бірл.), Chery Tiggo 2 (244 бірл.), Toyota Camry (213 бірл.) және Hyundai Sonata (197 бірл.) бар.
Анықтама:
«Қазақстанның Автокөлік Одағы» (ҚАО) – «Казахстанский Автомобильный Союз» заңды тұлғалар бірлестігі – 2023 жылдың 21 шілдесінде Астанада құрылған коммерциялық емес құрылым.
ҚАО құрамына Қазақстанның автоөндірушілер қауымдастығы; Қазақстанның автокомпонент өндірушілері қауымдастығы; Қазақстанның дилерлер қауымдастығы; Қазақстанның жүрген автомобильдерді сату бойынша қауымдастығы; Қазақстанның автосарапшылар және аудиторлар қауымдастығы (автомобильжасау өнімдерінің сәйкестігін бағалау) кірді.
Сіз жаңалықтар туралы не ойлайсыз