Оқиға желісінің 90% Вьетнамда түсірілген романтикалық комедия ел кинотеатрларына шықты. Сюжет бұрынғы ерлі-зайыптылардың жанжалынан басталады. Бұдан кейін басты кейіпкер жақын досымен бірге «шынайы махаббатын табу үшін» экзотикалық елге аттанады. Картинаның алдын ала көрсетілімі Шымкент пен Алматыда өтті. Көрермендер картинаға жоғары баға беріп отыр.
“Эмоцияларға толы керемет фильм: жыладық та, күлдік те. Көріністері өте әдемі. Арманыңа қол жеткізу үшін бірден теңіз жағасына барғым келіп кетті”, — дейді көрермендер.
“Табиғат пейзаждары өте әдемі. Таңдалған музыкасы да керемет. Өте жақсы кино екен”, — дейді шымкенттік көрермендер.
“Әзілдері өте ұтымды. Режиссер мен операторлардың сапалы жұмысы таң қалдырды”, — фильмнің алғашқы көрермендері ойларымен бөлісті.
Қазақ-Вьетнам жобасын Оңтүстік Азияда 25 күн, ал әсем Алматыда 5 күн түсірген. Фильмді түсірушілер, көрермендер көкжиегін кеңейтуді көздегендерін айтады.
“Оңтүстік Азия продакшны фильмге қызығушылық танытып отыр. Қазір лентаны Вьетнамда көрсету жайлы келіссөздер жүріп жатыр. Нақты шешім әлі қабылданбады. Біз әдемі, мейірімді, көтеріңкі көңіл-күй сыйлайтын, адал сезімді дәріптейтін әрі таңғажайып хикаяға толы кино түсіргіміз келді ”, — дейді картинаның бас продюсері Сәбит Рахимбаев.
Түсірілім тобына фильм барысы мен кадр сыртында да бірден бес тілде сөйлеуге тура келді. Олар: ағылшын, вьетнам, қазақ, орыс және француз тілдері. Бірақ басты қиындықтар ауа райы мен жергілікті вьетнамдық тағамдармен байланысты болды.
“Біз 2024 жылдың наурызында түсірдік. Аптап ыстық, маусымның басы. Сол уақыт оразамен тұспа-тұс келіп, актерлердің ауыздары берік болатын. Күн қатты ыстық, су ішуге болмайды. Оның үстіне рөліңді ойдағыдай орындау керек. Вьетнамдық тағамдарға да үйрену оңай болмады Таңғы асқа дәстүрлі фо сорпасын беретін. Біз ондайға үйренбегенбіз. Дегенмен, түсірілім ұйымдасқан түрде әрі көңілді өтті. Фильмде сапалы әзіл мен көңілді сәттер көп болады ”, — деді фильм режиссері Әнуар Матжанов.
Түсірілім командасы хабарлағандай, актерлік құрам Ақтөбе мен Астанада болып қайтпақ. Басты кейіпкерлер фильмді көрермендермен бірге тамашалайды. Билеттер онлайн-сатылымға шықты.
Сіз жаңалықтар туралы не ойлайсыз