FlyArystan өз әуе флотының жаңа Airbus A320 Neo ұшағымен толыққанын хабарлайды. Бұл қазақстандық лоукостер әуекомпаниясының 24-ші ұшағы. Әуе кемесі 188 жолаушыға арналған және алдыңғы қатарлы технологияларды, экологиялық тиімділікті және жоғары деңгейдегі жайлылықты үйлестіреді.
Airbus A320 Neo жаңа буынды қозғалтқыштармен және жетілдірілген аэродинамикамен жабдықталған, бұл жанармай шығынын 20%-ға дейін азайтуға және көмірқышқыл газы қалдықтарын едәуір төмендетуге мүмкіндік береді*. Сондай-ақ, ұшақтың шу деңгейі алдыңғы модельдермен салыстырғанда айтарлықтай төмен.
FlyArystan президенті Ричард Леджер:
«Тулуза қаласындағы Airbus компаниясынан су жаңа A320 ұшағын алу және оны қызметімізде пайдалану – бұл FlyArystan компаниясының дамуы үшін маңызды қадам және жоғары сапалы қолжетімді әуе тасымалдарын ұсыну жолындағы мақсатымызды жүзеге асыруда маңызды сәт. Бұл ұшақ бізге жаңа бағыттар ашумен қатар танымал бағыттар бойынша рейстердің жиілігін арттыруға мүмкіндік береді, сондай-ақ біздің экологиялық жауапкершілік ұстанымдарымызды растайды».
Жаңа әуе кемесі «Спика» атауына ие болды. Бұл түнгі аспандағы ең жарқын жұлдыздардың біріне арналып, әуекомпанияның қолжетімді әрі жайлы рейстер әлеміндегі көшбасшылыққа ұмтылысын сипаттайды.
Осы ретте, 2025 жылдың 1 қаңтарынан бастап FlyArystan-ның барлық рейстері жаңа FS кодымен (бұған дейінгң KC орнына) орындалады, жаңа код әуекомпанияға Халықаралық әуе көлігі қауымдастығы (IATA) тарапынан берілген.
* Статистика өндірушінің ресми сайтында жарияланған.
FlyArystan туралы:
FlyArystan – Air Astana тобының 100% еншілес компаниясы болып табылатын қазақстандық лоукостер. Компания өз қызметін 2019 жылдың мамыр айында бастады. 2025 жылдың қаңтар айынан бастап FlyArystan жеке сертификатына өтіп, FS коды бойынша дербес әуекомпания ретінде қызметін бастады. FlyArystan Алматы, Астана және Ақтау қалаларында орналасқан базаларынан заманауи Airbus A320 әуе кемелерінде кең ауқымды маршруттық желі бойынша рейстер орындайды. FlyArystan маршруттары ішкі және халықаралық рейстерді, сондай-ақ чартерлік бағыттарды қамтиды. FlyArystan 2023 және 2024 жылдары екі рет Skytrax World Airline Awards бойынша Орталық Азия мен ТМД-ның үздік бюджеттік әуекомпаниясы атанды.
Сіз жаңалықтар туралы не ойлайсыз