9 жастағы баланың дерті көз алды қарауытып, басы айналып құлағаннан кейін басталған.
Анасының айтуынша, тіркелген емханадағы учаскелік дәрігер оны бірден нейрохирургке жіберіпті. Көп ұзамай баланың жағдайы күрт нашарлап, әлсіздік, жүрек айну, құсу сынды белгілер пайда бола бастаған, деп хабарлайды №2 Қалалық клиникалық балалар ауруханасының баспасөз қызметі.
Аурухананың консультативтік-диагностикалық орталығы дәрігерлері науқастың басына компьютерлік томография жасап, көлемді ісікті анықтаған. Нейрохирургтер шұғыл түрде ота жасау үшін оны нейрохирургия бөлімшесіне жатқызу туралы шешім қабылдайды. Шұғыл шақырылған консилиум нәтижесінде: Ми діңінде көлемді өскін пайда болған, қан құйылған. Қайталанба, ішкі, өткір гидроцефалия. Бульбар синдромы. Атаксия. Сол жақ гемипарезі деген диагноз қойылды.
Қазақ ұлттық онкология және радиология ғылыми-зерттеу институты мамандары жасанды тыныстау аппаратымен тыныстап, ес-түссіз жатқан баланың ауыр жағдайын ескере отырып, химия немесе сәулелі терапия оң нәтиже бере қоймайды деген қорытынды жасаған. Оның үстіне, химия терапия онсыз да әлсіз ағзаны әлсіретіп, улап тастауы мүмкін болатын. Балаға қандай ота жасалса да соңы немен аяқталары да белгісіз еді. Дегенмен қол қусырып қарап отыруға болмайтынын түсінген №2 ҚКБА мамандары ота жасауға бел буды.
«Науқастың ауыр халін, мидың діңі зақымданғанын ескере отырып, өсіп шыққан ісікті интраоперациялық нейромониторинг мен нейронавигацияны пайдалана отырып, микрохирургиялық тәсілмен алып тастау туралы күрделі шешім қабылданды. Отаның мақсаты – бульбар синдромын басып, миға түсіп тұрған қысымды төмендету. Асқан дәлдікті талап ететін аса күрделі операция МӘМС есебінен жасалды», — дейді №2 ҚКБА бас дәрігері Марат Рабандияров.
Аурухананың Нейрохирургия бөлімшесі меңгерушісі Данияр Сәбденалиевтің сөзінше, 4,5 сағатқа созылған ота сәтті өтті. Оған нейрохирург А.Жайлғанов, анестезиолог А.Сеиткәрім, ассистент Р.Танцарова, медбике Б.Шагенова қатысты.
«Операциядан кейінгі кезең қалыпты жағдайда өтті. Комада жатқан бала аздап есін жия бастады. 2-ші күні жасанды тыныстау аппаратынан ажыратылып, өз бетінше дем ала бастады. Жағдайы тұрақтанып, жақсара бастағаннан кейін науқас ауруханадан шығарылды. Ары қарай ол Педиатрия және балалар хирургиясы ұлттық орталығында жатып, жоспарлы түрде химия терапия қабылдайды», — дейді ол.
Балалар нейрохирургі Марат Рабандияров бастаған 20-дан астам дәрігер баланың өмірін сақтап қалуға барын сала күресті. Білікті мамандар қолдан келмейтін дүниені жасап, аса күрделі отаны зергерге тән дәлдікпен жасап шықты. Миы ісіп, комаға түскен, жүрек қағысы бұзылып, өз бетінше тыныстай алмайтын науқастың жағдайын тұрақтандырып, оталарға дайындап қана қоймай, операциядан кейін есін жиып, қалпына келуіне де зор үлес қосты.
Сіз жаңалықтар туралы не ойлайсыз