Балаларға арналған міндетті екпелер: алматылық дәрігер екпе егу кестесі туралы айтып берді

№36 қалалық емхананың педиатры Әсел Ералықызы Қазақстан Республикасының Ұлттық екпе егу күнтізбесінде қарастырылған екпені әр бала алуы тиіс екенін атап өтті.

Байланысты

Депутат Еркін Әбіл: Тарихи сабақтастықты Конституцияда бекіту – ұлт жадын қорғау

Алматыдағы онкологиядағы жасанды интеллект: диагностикадан робототехникаға дейін – пациенттерге күтім жасау қалай дамып келеді

Ақмола облысы Қосшы қаласында бір ауысымда 1000 адамды қабылдауға арналған емхана ашылды

Бұл вакциналар вирустық A және B гепатиттері, b типті гемофилді инфекция, полиомиелит, туберкулез, дифтерия, сіреспе, көкжөтел, пневмококкты инфекция, қызылша, қызамық, эпидемиялық паротит (мысқыл ауруы) және басқа да қауіпті аурулардан қорғайды.

Вакцина сәбиге перзентханада жатқан кезінде-ақ салына бастайды.

— Перзентханада нәрестеге туберкулезге (БЦЖ) және B гепатитіне қарсы екпе егіледі. 2 айлық кезінде емханада балаға көкжөтел, дифтерия, сіреспеге қарсы кешенді вакцина (АКДС), сондай-ақ B гепатиті, полиомиелит, b типті гемофилді инфекция және пневмококкты инфекцияға қарсы екпе салынады. 3 айында АКДС, полиомиелит және b типті гемофилді инфекцияға ревакцинация жасалады. 4 айында осы ауруларға қарсы үшінші рет екпе егіліп, пневмококкты инфекцияға қайтадан вакцина жасалады, — деп бөлісті Әсел Ералықызы.

12-15 айлық кезінде балаға қызылша, қызамық, эпидемиялық паротит, полиомиелит және пневмококкты инфекцияға қарсы екпе егіледі.

1,5 жасында АКДС, полиомиелит және b типті гемофилді инфекцияға ревакциналау жүргізіледі.

6 жасында туберкулез, қызылша, қызамық және паротитке қарсы қайта вакциналау жасалады.

11 және 11 жас 6 айында адам папилломасы вирусына (АПВ) қарсы вакцина салынады, ол жатыр мойны қатерлі ісігі және осы вирусқа байланысты басқа да онкологиялық аурулардан қорғайды.

16 жасында сіреспе мен дифтерияға қарсы (АДС-м) екпе егіледі, оны одан әрі 10 жыл сайын қайталап жасату қажет.

Дәрігердің айтуынша, екпе балаларды жұқпалы аурудың ауыр түрінен қорғайды, бұл аурулар күрделі асқынуға, ұзаққа созылатын салдарға, тіпті өлімге әкелуі мүмкін.

— Вакциналау — қауіпті аурудың алдын алудың ең тиімді тәсілі. Ата-ана баланың мемлекеттік немесе жеке клиникаға тіркелуіне қарамастан, барлық міндетті екпенің тегін жүргізілетінін ұмытпауы тиіс, — деп атап өтті маман.

Уақтылы вакциналау — әр баланың денсаулығы мен инфекциядан қорғанысының кепілі.