Алматы қаласының *№ 7 Қалалық клиникалық ауруханасының* дәрігерлері, басқа клиникалардың бас тартуына қарамастан, өте күрделі диагнозы бар 65 жастағы пациентке ота жасады.
Жетінші аурухананың нейрохирургтары өте күрделі ота жасаудың озық тәжірибесін жинағаны көпшілікке белгілі, ол үшін клиникада барлық жағдай жасалған, барлық қажетті заманауи жабдықтармен жасақталған. Бірақ бұл жолы анестезиологиялық сүйемелдеуді жүргізген анестезиолог дәрігерлердің жоғары кәсіби біліктілігі мен ерен еңбектерін айрықша атап өткен жөн. Өйткені, үйлесімді командалық жұмыстың, нейрохирургтар мен анестезиологтардың үздіксіз өзара іс-қимылының арқасында аса күрделі ота сәтті жасалды. Бұл туралы 7 ҚКА баспасөз қызметі хабарлады.
Бұл отаның өзге оталардан күрделілігі неде? Пациент қарт адам, диагнозы « мида көлемі аса үлкен ісік», бұл әрине өте мұқияттылықты, біліктілікті талап ететін ауқымды жұмыс. Кейіннен гистологиялық зерттеу ісіктің қатерлі екенін растады. Алайда, бұл оның жалғыз сырқаты емес еді. Пациенттің бірқатар қосалқы ауруларының болуы жағдайды қиындатады. Пациенттің өкпесінде тыныс алу функциясының жеткіліксіздігіне әкеп соқтырған метастаза бар; бүйректі алып тастау бойынша бұрын жасалған операция (тек бір ғана бүйрек жұмыс істейді), сондай-ақ жүрек қызметінің жетіспеушілігі де бар. Бір жыл бұрын ол жүректің тәждік артериясын шунттау отасын жасатқан және жасанды ырғақ стимуляторы орнатылған.
Дәрігерлер оның өмірлік көрсеткіштеріне сәйкес отаға алуға шешім қабылдады. Науқастың ауыр жағдайына және асқыну қаупінің жоғары болуына қарамастан, дәрігерлер бұл оның өмірін құтқарудың жалғыз мүмкіндігі екенін түсінді.
Ең басты қиындық лайықты анестезиологиялық құрал таңдау болды. Пациенттің әрбір қосалқы ауруларының болуы, ерекше сақтықты талап етеді. Анестезиологтар тобы науқастың салмағын, жасы мен жалпы жағдайын ескере отырып, препараттардың мөлшерін мұқият есептеп алды.
«Әрбір препарат жүрекке, бүйрекке және тыныс алу жүйесіне түсетін жүктемені азайту үшін мұқият таңдалды. Ота барысында гемотрансфузия — қан құю қажет болды, ал қысымды қалыпты деңгейде ұстап тұру ол өзінше бір міндет болды. Біз қабылдаған шешіміміз дұрыс болды және біз пациентке өмір сүруге екінші мүмкіндік бергенімізді мақтан етеміз», — дейді 35 жылдық тәжірибесі бар № 7 қалалық клиникалық аурухананың *анестезиолог-дәрігері Болат Мырзахметов.*
Операция бірнеше сағатқа созылды. Нейрохирургтар асқынуларды болдырмай, қатерлі ісікті сәтті алып тастады. Анестезиолог мамандардың кәсіби біліктілігінің арқасында науқас наркоздан ауырлықсыз шықты. Зейнеткер отаны тек жақсы көтеріп қана қоймай, көп ұзамай өз аяғымен үйіне шықты.
Сіз жаңалықтар туралы не ойлайсыз