Инфляцияны болжау кезінде қолданатын модельге енгізілген алғышарттар инфляция болжамдарының дәл келетінін көрсетеді, деп хабарлайды Qazaqpress ҚазАқпаратқа сілтеме жасап.
Бұл туралы ҚР Ұлттық банкі төрағасының міндетін атқарушы Виталий Тутушкин Сенатта айтты.
Бүгін Сенат қабырғасында «2025 – 2027 жылдарға арналған республикалық бюджет туралы» ҚР заңы қаралып жатыр.
«10 айдағы ресми статистика елімізде инфляция 8,5 пайыз деңгейінде қалыптасқанын көрсетті, бұл 6-8 аралығында көрсетілген болжамнан асып түсті. Мұнда ТКШ тарифтерінің өсуі рөл ойнады, жанар-жағармайға шекті бағалардың жоспарлы түрде алынуы да қымбаттауға және инфляцияға ықпал етті. Ұлттық қордан қомақты қаражат алу, бюджеттің теңгерімсіздігі, теңгенің айырбас бағамының құбылмалылығы секілді проинфляциялық факторлар бар. Ресейден инфляция импорты сын-қатері төніп тұр. Қазан айында ондағы жоғары-негізгі мөлшерлеме 21 пайызға дейін көтерілді, бұл көрші елдегі инфляцияның жоғары деңгейін көрсетеді. Аталған факторларды ескере отырып, 2025 жылы 5,5-7,5 пайыз, 2026 жылы – 5-6 пайыз және 2027 жылы – 5 пайыз инфляция болжамы қаншалықты сенімді?», — деп сұрады Сенат депутаты Нұрлан Бекенов.
ҚР Ұлттық банкі төрағасының міндетін атқарушы Виталий Тутушкин бұл болжамдарға негіз бар екенін айтуда. Яғни, 2025 жылы 5,5-7,5 пайыз, содан кейін 2026 жылы – 5-7 пайызға дейін төмендеу байқалмақ.
«Неліктен біз бұған сенімдіміз? Біріншіден, қазіргі инфляция біз белгілеген болжамдарға сәйкес келді. Содан кейін инфляциялық күту төмендейді деп болжап отырмыз – өткен жылдың қазан айында 16 пайызды, биылғы қазан айында 12,5 пайызды құрады. Яғни, инфляциялық күтудің айтарлықтай төмендеуі экономикалық субъектілердің Ұлттық банк пен Үкімет тарапынан инфляцияны төмендету саласында қабылданатын шешімдердің дұрыстығын қолдайтынын және түсінетінін көрсетеді», — деді ол.
Сауда серіктес елдерде де спикер алдағы уақытта инфляцияның баяулауын болжап отыр.
«Қазіргі уақытта Ресейдегі инфляция динамикасы теріс сипатқа ие, ол өсіп келеді. Алайда келесі жылы Ресейдің орталық банкі инфляцияның айтарлықтай баяулайтынын болжады және негізгі мөлшерлеменің төмендеу процесі басталатынын айтуда. Бұл Ресей тарапынан Қазақстандағы ішкі бағаларға инфляциялық қысымның айтарлықтай төмендейтінін көрсетеді. Дегенмен біз орташа қатаң ақша-несие саясатын жалғастырамыз, егер инфляциялық процестердің тұрақты түрде төмендейтініне сенімді болмайынша, базалық мөлшерлемені төмендетпейміз. Жаңартылған болжамдар қосымша 29 қарашада жарияланады», — деді В. Тутушкин.
Фото: Sputnik / Абзал Калиев
Сіз жаңалықтар туралы не ойлайсыз