2024 жылдың 14-18 қазаны аралығында Алматы Қалалық жедел шұғыл көмек көрсету ауруханасында «Колопроктологиядағы лапароскопиялық технологиялар» тақырыбында тренингтер өтті.
Іс-шараның спикері Кельн қаласындағы (Германия) Евангелия ауруханасының жалпы, висцеральды және қан тамырлары хирургиясы клиникасының бас дәрігері, профессор Игорс Иесалниекс болды.
Тренингті Алматы қаласы Қоғамдық денсаулық сақтау басқармасы ұйымдастырды.
Профессор Иесалниекс қатысушыларға заманауи лапароскопиялық әдістер бойынша дағдыларын жетілдіруге мүмкіндік беріп, өзінің мол тәжірибесін бөлісті.
Тренингке әр түрлі медициналық ұйымнан, соның ішінде 4 ҚКА, 7 ҚКА, ОҚКП, БҚКА, ҚЖШККА және бірқатар қалалық емханадан 40 дәрігер хирург қатысты.
Курс бағдарламасы келесідей өзекті тақырыптарды қамтыды:
— лапароскопиялық араласуды дайындау және ұйымдастыру;
— колоректалды хирургиядағы Fast Track хаттамасы;
— дивертикулит кезіндегі лапароскопиялық хирургия және Крон ауруын емдеу;
— ойық жаралы колит пен тік ішек обырын емдеудің техникалық аспектілері;
— тоқ ішек ісігі кезіндегі Complete Mesocolic Resection (CME);
— тік ішек обырын және ректо-вагинальды жыланкөзді емдеу.
Қатысушылар тек дәріс тыңдап қана қоймай, ота жасау бөліміндегі практикалық жаттығуларға да белсене қатысты.
Тәжірибелік сабақта профессор Иесалниекс бірнеше ота, атап айтқанда, колостоманы жабуға арналған лапароскопиялық ота мен екі проктологиялық: геморроидэктомия және пиелонидалды синусқа ота жасады.
Барлық ота конференц-залдағы үлкен экранда көрсетілді, бұл қатысушыларға процедуралардың өту барысын бақылауға мүмкіндік берді.
Сондай-ақ профессор ойық жаралы колитпен және ішектің стриктурасымен ауыратын науқастың күрделі жағдайы бойынша кеңес беріп, одан әрі тексеру және мүмкін хирургиялық араласуды ұсынды.
Күн сайын теориялық сабақты практикамен ұштастырып, мамандар арасында белсенді пікірталас пен тәжірибе алмасуға ықпал етті.
Бұл курс колопроктологиядағы лапароскопиялық хирургияның соңғы жетістіктері туралы білуге, әріптестер және сарапшымен өзекті мәселелерді талқылауға тамаша мүмкіндік болды.
Тренингтің барлық қатысушысына, сонымен қатар қызықты және пайдалы дәрістер үшін профессор Иесалниекске алғыс білдіреміз!
Сіз жаңалықтар туралы не ойлайсыз