Аурудың алғашқы белгілері пайда болған кезде дереу дәрігерге көріну керек.
№36 қалалық емхананың дәрігері Гүлзада Төлегенова суық тию және вирустық аурулардың белгілерін айтып, олардың алдын алу бойынша кеңес берді.
«Қазір ЖРВИ-мен сырқаттанудың шарықтау шегі орын алды, көптеген науқас, әсіресе 60 жастан асқандар мен балалар ауырып жатыр. Негізгі белгілерге дене температурасының жоғарылауы, тамақ ауруы, жалпы әлсіздік, бас ауруы, жөтел, бұлшықет пен буындардың ауыруы жатады. Бұл белгілер пайда болған жағдайда емдеуді дер кезінде бастау үшін дәрігерге баруды кешіктірмей, үйге шақыруды ұсынамыз», — деп түсіндіреді маман.
Көбіне адамдар дәрігермен кеңеспей, дәріханалық препаратты қолдана отырып, ауруды өз бетімен жеңуге тырысады.
«Өзін-өзі емдеу, әсіресе ЖРВИ мен тұмау кезінде өз бетінше антибиотикті қолдануға болмайды. Антибиотик вирустық инфекцияларды емдемейді және асқыну тудыруы мүмкін. Оны тек науқастың жағдайына қарай дәрігер тағайындауы керек», — деп атап өтті ол.
Суық тиюді тиімді емдеу үшін дәрі-дәрмекті дұрыс қабылдау ғана емес, сонымен қатар ағзаны дәруменмен қамтамасыз ету маңызды, бірақ оны қабылдау да дәрігермен келісілуі керек.
«Иммунитетті арттыру кешенді тәсілді қажет етеді: салауатты өмір салты, таза ауада тұрақты серуендеу, сондай-ақ көкөніс пен жемісті көп тұтыну. Маманның тағайындауы бойынша аскорбин қышқылы сияқты қосымша дәруменді қабылдау маңызды. Сондай-ақ басқаларды жұқтырмас үшін дер кезінде дәрігерді шақыру қажет екенін ұмытпаған жөн», — деп түйіндеді сөзін Гүлзада Төлегенова.
Сіз жаңалықтар туралы не ойлайсыз