22-25 тамыз аралығында ҚР Ғылым және жоғары білім вице-министрі Динара Щеглова бастаған Қазақстаннан келген делегация цифрлық трансформацияның озық тәжірибесін зерделеу, сондай-ақ отандық университеттерді трансформациялау үшін практикалық цифрлық шешімдерді талқылау мақсатында Шэньчжэнь және Дунгуан қалаларындағы негізгі нысандар мен білім беру мекемелеріне барды.
Делегация құрамына Қазақстанның он үш жетекші университеттерінің өкілдері мен министрліктің цифрландыру және мемлекеттік қызметтер департаментінің өкілдері кірді.
Бірінші кезекте делегация Шэньчжэнь қаласына тоқтап, Қытайдың цифрландыру саласындағы соңғы жетістіктері көрсетілген цифрлық трансформация көрме залына барды. Экспозиция мемлекеттік қызметтерді жақсарту және білім беру мекемелерін дамыту үшін цифрлық трансформацияның әлеуетін көрсетті. Сондай-ақ смарт білім берудің озық шешімдері, соның ішінде ақылды сынып, интеллектуалды операциялық орталық және интеллектуалды ғылыми-зерттеу платформасы көрсетілді.
Сапар аясында министрлік өкілдері қытайлық әріптестермен цифрлық технологиялар және жоғары білім саласындағы ынтымақтастықты кеңейту мәселелерін талқылады. Цифрландыру саласында ғылыми әлеуетті дамытуға және тәжірибе алмасуға бағытталған бірлескен жобаларды іске асыру мүмкіндіктері қаралды.
«Білім, талант және экономика бір-бірімен тығыз байланысты. Huawei Қазақстандағы зияткерлік білім беруді дамытуға, сондай-ақ ғылым және жоғары білім министрлігімен және негізгі университеттермен ынтымақтастығымызды тереңдетуге және кеңейтуге дайын», — деп атап өтті Huawei компаниясының вице-президенті Ли Цзюньфэн мырза.
Қазақстандық делегация сонымен қатар жоғары білікті мамандарды даярлаудың инновациялық орталығы болып табылатын Шэньчжэнь университеттік қаласына барды.
Сапарды жалғастыра отырып, қазақстандық тарап Дунгуан қаласына барып, Оңтүстік зауытқа және Huawei (R&D) зерттеу және әзірлеу орталығында болды. Қонақтар зауытта қолданылатын өндірістік қуаттар мен озық технологиялармен танысты, сондай-ақ зерттеулер мен әзірлемелер саласындағы ынтымақтастықтың ықтимал бағыттарын талқылады.
Министрлік делегациясының Қытай Халық Республикасына сапары цифрландыру, ғылым және білім беру саласында Қытаймен екіжақты ынтымақтастықты нығайту жолындағы маңызды қадам болды. Осы сапар шеңберінде бірлескен жобаларды талқылау және тәжірибе алмасу екіжақты қатынастарды одан әрі дамытуға және екі елдің ғылыми және білім беру әлеуетін нығайтуға негіз болады.
Сіз жаңалықтар туралы не ойлайсыз