Ақтауда «Таза жағалау» ауқымды экоакциясы өтті. Экоакцияны ұйымдастырушылар жағалауды бөліктерге бөліп, әрқайсысына үйлестіруші тағайындады. Нәтижесінде, жағалаудағы сәулеттік мүсіндер ретке келтіріліп, бес шақырымдық жағалау аймағы қоқыстан тазартылды. Дайверлер де экоакциядан қалыс қалмады.
— Тереңдігі шамамен бес метрден кейін басталады, теңіз түбінде шыны және пластик бөтелкелер, сондай-ақ, металл консервілер жиі кездеседі. Каспий теңізінің мөлдір суы тұрмыстық қалдықтарды алыстан анық көруге мүмкіндік береді. Мұндай акциялар тұрақты түрде өткізіліп тұруы керек деп ойлаймын, – дейді сүңгуір Жәнібек Ғазизов.
Сонымен қатар, сүңгуірлер жағаға құрал-жабдықтарын қойды. Олар теңіз түбін жиналған қоқыстан тазартады. Қоқыстар арасында пластик, сөмкелер және металл банкалар көп кездеседі. Командир лейтенант, сүңгуір қызметінің аға нұсқаушысы Сайран Әбдікәрімов Қазақстан Республикасы Әскери-теңіз күштерінде 9 жылдан астам қызмет етіп келеді. Ол әскерилердің мұндай әрекеттерді қолдауға әрқашан дайын екенін атап өтті.
— Үш сүңгуір шамамен 250 шаршы метр аумақты бөліп, әрқайсысы қоқыс жинады. Өткен жолы 10 сөмке жинаған едік, бұл жолы – 12. Мұндай шараларға әрқашан қуана қатысамын, өйткені теңіз таза болуы керек, – деді сүңгуір.
15 тамызда «Таза Қазақстан» акциясы аясында Ақтау қаласының 19а шағынауданында «Таза мектеп» экоакциясы өтіп, оған білім беру мекемелерінің қызметкерлері мен қала жастары қатысты. Акция жаңа оқу жылында пайдалануға берілетін мектеп ғимаратының айналасында өтті. Дәл осы күні осы жылы пайдалануға берілетін Мұнайлы ауданының Қызылтөбе ауылындағы тағы бір мектеп өз аумағында сенбілік ұйымдастырды.
— Жаңа оқу жылы қарсаңында біз «Таза мектеп» экоакциясына қатыстық. Мұндай іс-шаралар балалар үшін қауіпсіз және жайлы оқу ортасын жасауға көмектеседі. Білім ошақтарының маңайындағы тазалық пен тәртіп тек сыртқы келбетті жақсартуға ғана емес, сонымен қатар оқушылардың қоршаған ортаға деген құрметін арттыруға да септігін тигізеді, — дейді Қызылтөбе ауылындағы №18 орта мектеп директорының оқу ісі жөніндегі орынбасары Салтанат Нұрмамедова.
15 тамызда «Таза Қазақстан» акциясы аясында Ақтау халықаралық әуежайына апаратын жол учаскесінде сенбілік өтті. Оған 50-ге жуық адам қатысып, санитарлық тазалау жұмыстарына арнайы техникалар жұмылдырылды.
-Табиғатты аялаудың, тазалықты сақтаудың маңыздылығын адамдардың бойына сіңіруіміз керек. Қоршаған ортаға қамқорлық көрсетуді ортақ іске айналдыру үшін осындай акцияларды жиі өткізіп, қатысушыларды көбірек тарту қажет, — дейді жастар жетекшісі Бақтияр Мақсатов.
Айта кетейік, 10 тамызда Маңғыстауда «Таза Қазақстан» акциясы аясында ауқымды сенбілік өтті. Жағалауды, саябақтарды, алаңдарды, тіпті теңіз түбін тазалауға 3 мыңнан астам адам шығып, 100-ге жуық арнайы техника жұмылдырылды. Барлығы 300 тонна қоқыс жиналып, шығарылды. Сондай-ақ, Ақтау және Жаңаөзен қалаларына Мұнайлы, Маңғыстау, Түпқараған, Бейнеу және Қарақия аудандары қосылды.
Сонымен қатар, «Таза Қазақстан» экологиялық акциясы аясында тамыз айында челлендж түрінде «Мектепке жол, тазалыққа нық қадам!» акциясы өтуде. Аталмыш шараның мақсаты – 2024-2025 оқу жылына білім беру ұйымдарын ағымдағы жөндеу, абаттандыру, мектептерге іргелес жатқан жолдарға жол схемалары мен белгілер орнату, жарықтандыруды қалпына келтіру және тазалық жұмыстарын күшейту. «Мектепке жол, тазалыққа нық қадам!» атты челлендж Ақтаудан бастау алып, қазіргі уақытта басқа қалалар мен аудандарда эстафета түрінде жалғасуда.
Бұған қоса, тамыз айының соңына дейін «Маңғыстаумұнайгаз» АҚ қызметкерлері Каспий теңізінің жағалауында экоакция өткізуді жоспарлап отыр.
Сіз жаңалықтар туралы не ойлайсыз