Алматы облысында тұратын жалғызбасты ана алаяқтарға алданып, банкке 1,5 млн теңгеге қарыз болған, деп хабарлайды Qazaqpress.
Бұл туралы жапа шеккен ана, Ұзынағаш ауылының тұрғыны Фарида Жарылқасынова Kazinform тілшісіне айтып берді.
Кейіпкердің айтуынша, ол өткен жылы Ақтау қаласында Азамат есімді жігіттің алаяқтық әрекетінің құрбаны болған.
«Өткен жылы 17 наурызда Ақтау қаласы 26-шы шағын ауданда орналасқан дүкенде тауарлық несиені рәсімдегім келді. Маған Азамат Қуатов есімді жігіт кездесіп, көмектесе алатынын айтты. Ол қызметі үшін 1 млн теңгенің 30 пайызын сұрады. Кейін ол Ақмарал есімді көмекшісі екеуі маған өтініш жазуымды сұрады. Екі-үш күн ішінде ақша менің қолыма тиді. Кейін ол ақша маған қажет болмаған соң, ақшаны оларға қайтарып, алған несиені жабуды сұрадым. Олар келісіп, ақшаны өздеріне қалдыруды сұрады. Мен келісіп, ақшаны оларға қалдырып, Алматыға кетіп қалдым. Бір-екі апта өткен соң маған Home Credit Bank-тен қоңырау шалып, менде несие бойынша мерзімі өткен берешегім бар екенін айтты. Мен оған таң қалып Азаматқа хабарласып, жағдайды айттым. Кейін Азамат біраз уақыт қарызды төлеп жүрді, алайда, уақыт өте келе төлемей қойды. Қазір ол, тіпті менің үстімнен арыз жазатынын айтып қорқытуда. «Заң жүзінде несиені мен емес, сіз алдыңыз», «сіз ешетеңе дәлелдей алмайсыз», «қажет болса мүлде төлемеймін» деді маған», — дейді Фарида Жарылқасынова.
Осыған байланысты кәмелетке толмаған екі баласы бар Фарида Жарылқасынова өмірлік қиын жағдайға тап болды.
«Азамат менің оған сенгенімді пайдаланып, мені жаңылыстырып, сондай-ақ, өкілеттігін асыра пайдалана отырып, менің атыма заңсыз тауарлық несиені рәсімдеп, оны төлемей отыр. Бұл алаяқтық әрекетімен маған материалдық шығын келтірді. Негізі мен тауарды да, несие ақшасын да алған жоқпын. Бүгінгі күні мен 1,5 млн теңге несиені төлеуге мәжбүрмін. Шағын несиені алар кезде мұндай жағдай боларын білген жоқпын. Ал «Home Credit Bank» болса мені несие шарты бойынша міндеттемелерді орындаудан қасақана жалтарушы санайды және істі коллекторлық қызметке берген. Сол себепті маған қазір әртүрлі адамдар, коллекторлар қоңырау шалып, несиені қайтаруды талап етуде», — дейді жалғызбасты ана.
Ол Азамат Қуатовтың үстінен қылмыстық жауапқа тарту, аталған іс бойынша жан-жақты тексеру қажеттігі туралы құзырлы органдарға, атап айтқанда Ақтау қаласының полиция басқармасы, Ақтау қаласының прокуратурасы, ҚР Бас прокуратураға, ҚР Қаржы нарығын реттеу және дамыту агенттігі, «Home Credit Bank» АҚ-ға хаттар жазған. Алайда, мәселе әлі оңды шешімін таппаған секілді. Себебі, жүргізілген тексерістердің қорытындысы бойынша несиені рәсімдеу барысында ешқандай алаяқтық белгілері анықталмаған.
Төрт баласы бар жалғызбасты ана Фариза Жарылқасынова басына түскен мәселесі оң шешімін табарына әлі үмітті. Ол сондай-ақ Азамат Қуатов секілді жандар өзінен бөлек, басқа да көптеген адамдарды алдап жүрген болуы мүмкін екенін айтты.
Сіз жаңалықтар туралы не ойлайсыз