Бір жасқа дейінгі массаж: пайдасы, кімге және қашан жасау керек
Бұл туралы бізге №16 Қалалық емхананың оңалту және қалпына келтіру емі орталығының меңгерушісі Аида Жакипбекова айтып берді.
Маманның айтуынша, балалардың денсаулығы — ата-аналардың өміріндегі ең басты жауапкершілік. Және ересектердің баланың денсаулығы мен дамуы мәселесіне қаншалықты жауапкершілікпен қарайтындығына баланың өмірі байланысты болады.
Балалар массажы — бұл оңалу және ауырмау үшін ең жақсы құрал. Педиатрлар көбінесе бір жасқа дейінгі кішкентай балаларға, емізулі нәрестелерге массаж сеанстарын тағайындайды.
«Бірнеше массаж курсының арқасында, балаңыздың иммундық жүйесі нығаяды, егер проблемалар болса, сау болады. Сондай-ақ, массаж баланың дамуына оң әсер етеді. Бала дұрыс дамиды», — деп атап өтті дәрігер.
Сау балаларға педиатр өмірдің бірінші жылында жәй ғана, алдын алу және дұрыс даму үшін 3-5 сеанста массаж курсын тағайындай алады. Егер балаға емдік мақсатта массаж қажет болса, онда нәрестеге өмірінің бірінші жылында 10-ға дейін массаж сеансы тағайындалуы мүмкін.
«Массаж баланың тез қалпына келуіне ықпал етеді, әсіресе мойынның қисаюы, балалардағы жамбас дисплазиясы, жалпақ табан, сколиоз, әртүрлі неврологиялық аурулар және т.б. Егер бір жасқа дейінгі балада ішектің бұрып ауыруы және тұрақты кебулер болса, онда массаж міндетті түрде қажет»,- деп хабарлайды Аида Жакипбекова.
Балаға бір жасқа дейін массаж жасау келесі әдістерді қамтиды: сипау, ысқылау, илеу, дірілдету. Олардың әрқайсысына толығырақ тоқталайық.
- Сипау. Сипалау техникасы балаларға туғаннан бастап көрсетіледі. Ананың жылы қолының жанасуы нәрестені тыныштандырады. Балаңыздың өмірінің алғашқы үш айында тек осы техниканы қолданыңыз. Нәзік сипалаулар денені босаңсытады, теріні одан әрі манипуляциялауға дайындайды. Сіздің қозғалыстарыңыз бірқалыпты және жеңіл болуы керек.
- Ысқылау. Бұл массаж әдісін кішкентайыңыз 3 айлық болғанда қолдануға болады. Баланың терісін қатты, бірақ ақырын ысқылау керек. Яғни созу емес, жәй ғана байыппен ысқылау. Бас бармағыңызбен немесе алақаныңыздың түбімен шеңбер бойымен немесе түзу сызықпен ысқылауға болады. Әр түрлі жаттығулар бар, онда сізге бір немесе басқа әдіс пайдалы болуы мүмкін.
- Илеу. Бұл әдіс қамырды илеу әдісімен ұқсас. Бірақ ұмытпаңыз баланың терісі өте нәзік, сіз қатты баса мыжа алмайсыз. Қозғалыстарды байыппен, жұмсақ орындаңыз. Бұл әдісті қолдана отырып, сіз баланың бұлшық еттеріне ықпал етесіз. Сондықтан сіздің кішкентайыңыз бұл техниканы қолданғанда бірінші рет наразы болуы мүмкін. Мұны түсіністікпен қабылдаңыз, оны ойыншықпен алдауға тырысыңыз, онымен сөйлесіңіз. Жаттығудың ұзақтығын біртіндеп арттырыңыз. Бірнеше күннен кейін ол үйреніп, одан ләззат алады. Бұл әдісті қолданған кезде балаңыздың бұлшық еттерін саусақтарыңызбен, теріні қысып, алақаныңыздың түбімен сезіп илеңіз.
- Дірілдету. Бұл әдіс жұмсақ түртулер, саусақтардың жастықшаларымен немесе алақанның шетімен ұрғылауды білдіреді. Ешқашан қатты баспаңыз! Әдетте діріл кеудеге және арқаға массаж жасағанда қолданылады.
- Қорытындылай келе, дәрігер әр баланың дара екенін ұмытпағанды атап өтті, сондықтан оның массажға реакциясын қадағалап, оны қажеттіліктері мен қалауларына бейімдеу маңызды.