Кызылша — әлемдегі ең жұқпалы, өлімге әкелетін аурудың бірі. Оған қарсы жалғыз әрі сенімді құрал — вакцинация.
No36 қалалық емхана директоры Гүлжайнат Тілегеннің айтуынша, қызылшамен ауырғандар бөртпе пайда болғанға дейін төрт күн және одан кейін төрт күн жұқпалы болады. Бұл, өз кезегінде, аурудың таралуын тежеуді қиындатады. Қызылша пневмония, энцефалит сияқты ауыр асқынуға, тіпті өлімге әкелуі мүмкін.
«Қызылша ауруының ауыр асқынуына балалар осал келеді. Қызылша дамушы елдердегі балалар өлімінің басты себебінің бірі. Ал вакцинация — балаларды қызылшадан қорғаудың ең тиімді әдісі. Вакцина қауіпсіз әрі тиімді және ауруға қарсы ұзақ мерзімді иммунитетті қамтамасыз етеді. Сол себепті вакцина ауруды емдеуден әлдеқайда арзан», — дейді Гүлжайнат Тілеген.
Балаларды қызылшадан қорғау үшін оларды вакцинациялау өте маңызды, өйткені тек вакцина қызылша ауруының өршу қаупін азайтып, өмірді сақтауға көмектеседі.
«Бірінші егу 12 айлық балаларға, екіншісі 6 жасқа толғандарға жүргізіледі. Қызылшамен ауыратын науқастардың көбеюіне байланысты Қазақстанда қызылша, қызамық және паротитке қарсы қосымша жаппай иммундау жүргізіліп жатыр. Қазір біздің емханада 6 айдан 10 ай 29 күнге дейінгі балаларға егу жүргізіліп жатыр. Келесі айдан (1 желтоқсаннан) бастап 2 жастан 4 жас 11 ай 29 күнге дейінгі балалар егіледі. Бұл ауру жұқтырған балалардың 60%-ының жоспарлы түрде екпе алмауына, көп жағдайда ата-анасының екпеден бас тартуына байланысты», — деп толықтырды дәрігер.
Сөзінің соңында Г. Тілеген Наурызбай аудандық СЭБД-мен бірлесіп профилактикалық және эпидемияға қарсы іс-шаралар тұрақты түрде жүргізіліп жатқанын, оның аясында екпе науқанымен қатар, балаларға білім беру ұйымдарында вакцинациямен қамтудың шекті деңгейі кемінде 90%-ды құрауын қадағалау, сондай-ақ халық арасында ақпараттық-түсіндіру жұмысының жалғасып жатқанын баса айтты.
Сіз жаңалықтар туралы не ойлайсыз