Директор Нұрсұлтан Избагамбетовтың айтуынша, Алматы онкологиялық орталығы қатерлі ісігі бар науқастарға мамандандырылған медициналық көмек, атап айтқанда, жоғары технологиялық медициналық қызмет: хирургиялық емдеу, ісікке қарсы препараттармен емдеу, сәулелік және иммундық терапия, психологиялық және әлеуметтік көмек көрсетеді.
Алматы онкологиялық орталығында емделушілер саны жыл сайын артып келеді. Мәселен, 2023 жылдың бірінші жартыжылдығындағы статистикаға қарасақ, АОО-да 10,5 мың науқас ем алған (2022 жылы 6 айда 9,5 мың). 2016 жылы ем алған науқастардың мұндай саны жыл соңында тіркелсе, қазір бұл көрсеткішке 6 айда жетіп отыр.
«Қазірдің өзінде қалалық онкологиялық орталықтың хирургиялық бөлімшелерінде 1500-ден астам хирургиялық ота жасалды. Олардың көпшілігі оңалту уақытын қысқартуға және үлкен кесуді болдырмауға мүмкіндік беретін лапароскопияны қолданатын бірегей жоғары технологиялық заманауи гинекологиялық, маммологиялық, кеуде қуысына жасалатын, абдоминальды, урогенитальды оталар. Бұл шағын инвазивті технология, мұндай ота жасату үшін біздің азаматтар шетелге баратын. Алматы онкологиялық орталығы Қазақстандағы ашық және лапароскопиялық ота жасайтын клиникалардың бірі. Бұл үшін Орталықта барлық қажетті медициналық құрал-жабдық бар», – дейді онколог.
9000-ға жуық онкологиялық науқас химиотерапиялық ем алды, радиология бөлімінде 10000-нан астам сәулелік терапия сеансы жүргізілді.
Сондай-ақ, Алматы онкологиялық орталығының амбулаторлық химиотерапия кабинетінде 5 мыңға жуық онкологиялық науқас амбулаторлық ем алды.
Қатерлі ісікке күдікті науқастар мен онкологиялық науқастар үшін 300000-нан астам КТ және МРТ, эндоскопиялық және цитологиялық зерттеулер, ультрадыбыстық, ИГХ және т.б. диагностикалық зерттеу жүргізілді.
Қорытындылай келе, онколог дәрігер елімізде тегін скринингтік тексерулер жүргізілетінін, уақтылы профилактикалық тексеруден өту керек екенін тағы бір еске салады.
Қатерлі ісік неғұрлым ерте анықталса, толық емделу мүмкіндігі соғұрлым жоғары болады.
Сіз жаңалықтар туралы не ойлайсыз