Қазақстанда онкологиялық көмек халыққа тегін медициналық көмектің кепілдік берілген көлемі аясында көрсетіледі.
Алматы онкологиялық орталығының консультативтік-диагностикалық бөлімінің меңгерушісі Нәйлә Ақжолованың айтуынша, қатерлі ісікпен ауыратын науқастарға онкологиялық көмек бірінші, екінші және үшінші деңгейде көрсетіледі.
Пациенттерге жеке медициналық көмек көрсетуді қамтамасыз ету үшін медициналық көмектің барлық деңгейінде көпбейінді топтар құрылады.
Қаладағы 76 емхана бастапқы деңгейде онкологиялық көмек көрсетеді. Емхана жұмысының негізгі мақсатының бірі қатерлі ісік ауруын ерте кезеңде белсенді түрде анықтау болып табылады, оған қол жеткізу үшін халықтың мақсатты топтарына скринингтік тексеру жүргізіледі. Бүгінгі таңда Алматыда мақсатты халық тобының 70 пайыздан астамы скринингтік тексерумен қамтылған.
Егер ЖТД ісік ауруына күдіктенсе немесе диагноз қойылса, дәрігер науқасты одан әрі тексеру үшін емханадағы онкологқа жібереді.
Егер онколог қатерлі ісікке күдікті растаса, науқас Алматы онкологиялық орталығының консультативтік-диагностикалық бөліміне жіберіледі.
«АОО-да онколог диагнозды, онкологиялық процестің таралуын және аурудың сатысын, аурудың қайталануын анықтау үшін қажетті тексеру мен диагностикалық зерттеулер жүргізеді. Көрсеткіштерге сәйкес, мультидисциплинарлық топтың ұсынысын ескере отырып, пациент мамандандырылған медициналық көмек, соның ішінде жоғары технологиялық медициналық қызметті алу үшін ауруханаға жатқызылады, немесе оған ісікке қарсы амбулаторлық терапия көрсетіледі», — деп атап өтті онколог.
Диагноз қойылған сәттен бастап онкологиялық науқас тіркелген жері бойынша амбулаторлық негізде медициналық көмек көрсететін ұйымда өмір бойы медициналық динамикалық бақылауда болады.
Ел, аймақ ішінде тұрғылықты жерін немесе тіркелген ұйымды ауыстыру кезінде науқас динамикалық бақылаудан алынбайды, құжаттарды бастапқы не екінші деңгейлі медициналық ұйымға жібере отырып, жаңа тіркелген тұрғылықты жері бойынша көмек алады.
Сіз жаңалықтар туралы не ойлайсыз