Арман мен тағдыр ұштасып, 30 жылдан аса балалардың денінің саулығы, өсіп дамуы жолында еңбек етіп келе жатқан № 11 Қалалық емхананың педиатрия бөлімшесінің мейіргері, супервайзер- Шойбекова Райкул Манапқызы.
1991жылдан бастап Алматы қаласындағы облыстық балалар ауруханасында мейіргер болып еңбек жолын бастаған ол, 18 жылдан бері учаскелік балалар мейіргері. Жұмыс кезеңінде өзін сауатты және білікті маман ретінде көрсетті, медициналық манипуляцияларды жетік біледі, медицинадағы жаңа жетістіктерді бақылайды, практикада қолданады.
Білімін жетілдіру циклдары бойынша курстардан өтіп, конференцияларға, тренингтерге қатысу арқылы кәсіби деңгейін үнемі арттырып отырады. «Юнисеф» бағдарламасы бойынша тереңдетілген «Жүкті әйелдер мен жас балаларға патронаждық қызмет көрсетудің әмбебап прогрессивті моделі дағдарыстар мен төтенше жағдайларға дайындық» курсынан өтіп тренер сертификатын алды. Жас мамандарға тәлімгер, ата- аналарға, балалар тәрбиелеушілеріне кеңесші.
«Балалар мейіргері болу жауапкершілікті, біліктілікті талап етеді. Баланы ұрпақ жалғастырушы, елдiң болашағы дейміз. Сырқатын айтуға тілі жоқ сәбидің денінің саулығын, даму ерекшеліктерін байқау үшін сезімталдық қасиет, қырағылық қажет. Ол үшiн баланың тәнi мен жанын жақсы бiлуiң керек»- дейді Райкул Манапқызы.
Әріптестермен қарым-қатынаста ол мейірімді және талапшыл, қиын жағдайларда тез және дұрыс шешімдер қабылдайды. Әріптестеріне, жас мамандарға жұмыс барысында қажетті көмек көрсетеді, мәдени деңгейі жоғары және ой-өрісі кең маман. Емхананың қоғамдық өміріне белсенді қатысады. Әріптестер мен балалардың, олардың ата- аналарының арасында құрмет пен беделге ие. Бірнеше рет алғыс хаттармен марапатталған.
Сіз жаңалықтар туралы не ойлайсыз