Президент 1 қыркүйекке дейін елге кіргізілетін шетел көліктерін бір рет тіркеу құқығы жайлы мәлімдеді. Ішкі істер министрлігі заңдастыру жұмыстарының процесі туралы баяндап берді, деп хабарлайды Qazaqpress Tengrinews-ке сілтеме жасап.
«Әзірге заңнамаға қажетті өзгерістер енгізілуде. Парламент заңдастыруға жататын автокөліктердің алғашқы тіркеу құны 200 мың теңге мөлшерінде белгілеп, Салық кодексіне енгізілген алғашқы түзетулерді қабылдады. Сонымен қатар, екінші заң жобасы аясында Экологиялық кодекске осы көліктерді ақылы түрде кәдеге жарату туралы заңның күшін жою деген бөлігіне түзетулер енгізілуде. Оған қоса, Ішкі істер министрлігі Үкімет қаулысының жобасын әзірлеуде, оның тәртібін, шарттарын және т.б. Аталмыш жоба 29 қарашада қоғамдық талқылау үшін Ішкі істер министрлігінің ресми сайтында жарияланды», – деді ІІМ ҚАП төрағасының міндетін атқарушы Қайсар Сұлтанбаев.
Төменде Қазақстандағы көліктерді заңдастыру тақырыбы аясында спикер азаматтарды мазалап жүрген басты сұрақтарға жауап берді:
Қандай көліктерді заңдастыруға болмайды?
Іздеуге салынған және кедендік ресімдеуден өтпеген, сондай-ақ 2022 жылғы 1 қыркүйектен кейін елге кіргізілген автокөліктер.
Осы таңға дейін Қазақстанға қанша шетел көлігі кіргізілді?
Қазақстанда нақты тіркелген шетелдік көліктердің саны туралы анық деректер жоқ. Онымен қоймай, біз ағымдағы жылдың 1 қыркүйегіне дейінгі кезеңде шамамен 300 мыңнан астам шетелдік автокөлікке сақтандыру полистері берілгенін анықтадық. Автокөлік сақтандыру бойынша бірінші орында Ресей Федерациясынан келген көліктер тұр – 260 мыңға жуық автокөлік сақтандырылған, Қырғызстаннан – 25,5 мың, ал Армениядан – 18 мың көлікке сақтандыру полистерк берілген.
Шетелдік көліктерді заңдастыру жұмыстары қашан басталады және қанша уақытқа созылады?
Заңдастыру қажетті заңнамалық өзгерістер енгізіліп, үкіметтің тиісті қаулысы қабылданғаннан кейін ғана басталады. Негізі, заңдастыру жұмыстарын алты айдың ішінде жүзеге асыру жоспарлануда.
Көліктің елге кірген уақыты қалай тіркеледі?
Көліктің елге кірген күні ҰҚК Шекара қызметінің мәліметтер базасы арқылы анықталады, бүгінде бұл процесс толық автоматтандырылған. Ал, Шекара қызметiнде автокөліктің елге кіргені жайлы мәлiмет болмаса, алғаш рет сақтандыру полисін алған уақытымен есептелінеді.
Қазақстанда заңдастыру аясында азаматтар «оң рульді» көліктерді тіркей алады ма?
Мемлекет басшысы заңдастырудың екі талабын айтқаны жайлы өздеріңізге де мәлім: біріншісі – көліктерге іздеу жарияланбау керек, екіншісі – кедендік ресімдеуден өту керек. Егер көліктер осы екі басты талапқа сай болса, оларды тіркеуге ешқандай кедергі болмайды.
Автокөліктерді шығарылған жылы мен экологиялық деңгейі бойынша шектеу бар ма?
Заңдастыруға жататын көліктерге жылы мен экологиялық деңгейі бойынша шектеулер жоқ.
Қазақстанда уақытша тіркелген «армяндық» көліктерге «сары» нөмір беріліп, заңдастырылу мүмкін бе?
Елімізде уақытша тіркелген «армяндық» көліктер де мемлекеттік тіркеуден өтеді, бірақ олардың кедендік декларациясы талап етілмейді, өйткені 2023 жылдың 1 қаңтарынан бастап олар Еуразиялық экономикалық одақтың тауары болып танылады.
Қазіргі таңда заңдастыру құны қанша теңгені құрайды?
Негізгі төлем, яғни бастапқы тіркеу құны – ол 200 мың теңге. Ал, тіркеу куәлігі мен тіркеу нөмірі сынды төлемдер тағы 13 171 теңге құрайды (2023 жылдың 1 қаңтарынан бастап тіркеу нөмірі мен тіркеу куәлігі үшін төлем сомасы аздап өзгеріске ұшырайды, өйткені баж салығы АЕК-ке байланысты есептеледі).
Заңдастыру процесі қалай өтетінін қысқаша сипаттай аласыз ба?
Көлік тіркеу өтінішін «электрондық үкімет» порталы арқылы немесе Арнайы ХҚО-ға жүгіну арқылы өтініш беруге болады. Ұсынылған құжаттар мен автокөлік іздестіру базалары бойынша тексерістен өткеннен кейін, автокөлік нөмірлерін салыстыру үшін Арнайы халыққа қызмет көрсету орталығының тексеру пунктіне жіберіледі. Одан кейін 200 мың теңге көлемінде алғашқы төлем жасалып, техникалық төлқұжат пен мемлекеттік нөмір үшін мемлекеттік баж салығы төленеді, қажет болған жағдайда кедендік баж салығы да төлену мүмкін. Көлік тіркелгеннен кейін иесіне қазақстандық тіркеу куәлігі мен мемлекеттік нөмір беріледі.
Сіз жаңалықтар туралы не ойлайсыз