Айдос Ербосынұлының командасы оның денсаулығына қатысты мәлімдеме жасады

Suleimen Promotions командасы қазақстандық боксшы Айдос Ербосынұлының денсаулығына қатысты мәлімдеме жасады, деп хабарлайды Qazaqpress Instagram-дағы «Қазақстанның кәсіпқой боксы» парақшасына сілтеме жасап.

«АҚШ-тағы өкіліміздің сөзінше, боксшымыздың денсаулығы айтарлықтай жақсарды, соның ішінде физикалық жағдайы – Айдос өздігімен аяғын басып, жүре алады. Сондай-ақ боксшымыздың ақыл-есі жақсы. Онымен қоса, Айдос дәрігерлердің сұрағын түсініп, оларға оп-оңай жауап беріп жатыр. Мамандар мәліметіне сәйкес, Айдос тез сауығып келеді.

Өкіліміздің айтуынша, таяу уақытта боксшымыз ауруханадан шығарылып, ол отанына оралуы ықтимал.

Сондай-ақ АҚШ-қа Айдостың жұбайы келді. Қазір ол боксшының жанында. Әрине, ол үшін бұл үлкен қолдау», — деп мәлім етті Suleimen Promotions компаниясынан.

Еске салсақ, қараша айының басында қазақстандық боксшы кубалық Давид Моррельден нокаутпен жеңілген болатын.