Балалардың көру қабілетін қалай сақтауға болатыны жөнінде Алматы қаласының офтальмолог дәрігері айтып берді.
— Бала теледидармен және компьютермен неғұрлым кеш танысса, көзінің саулығы да соғұрлым жақсы болады, — деді Алматы қаласы №16 Қалалық емханасының офтальмолог дәрігері Жібек Тажидинова.
Ересектерге де, балаларға да қараңғыда телефон және компьютер қарау ұсынылмайды.
«Балалар көп уақытын үйден тыс жерде өткізуі керек, өйткені олар үй қабырғасында теледидарға емес, қашықтыққа қарау керек. Үй тапсырмасын орындап, кітап оқыған кезде түсетін жарық прожектор секілді болмауы керек. Шамның қуаты 40-60 Вт аспағаны абзал. Ең бастысы, жарық қараңғыланған болмауы тиіс. Содан кейін кем дегенде бір-екі сағат үзіліс жасаған дұрыс. Балаларға телефоннан мультфильмдер көру ұсынылмайды. Жеті жасқа дейін көзге мұндай жүктемелер түспеуі қажет»,- деді дәрігер.
Офтальмолог түсіндіргендей, миопияның алдын алудың негізгі қағидасы – жұмысты жақын қашықтықтан орындауды шектеу.
Сонымен қатар, дәрігер жыл сайын көру қабілетін тексеруді ұмытпауға кеңес берді.
Сондай-ақ, маман бас жарақаттарынан мейлінше абай болуға, дұрыс тамақтануға кеңес береді.
«Тағам әр түрлі болуы керек. Ас үлесіне жемістер, көкөністер және балықты қосқан дұрыс. Дұрыс тамақтану өте маңызды, өйткені тамақтану арқылы біз ағзамызға маңызды микроэлементтер мен дәрумендерді аламыз», — дейді дәрігер.
Ересектерге де, балаларға да тиімді болатын маманның тағы бір кеңесі: көзге арналған жаттығулар жасауды ұмытпау.
«Егер көзілдірік немесе көзге арналған линзалар тағып жүрсеңіз, жаттығуды бастамас бұрын оларды шешіп тастаған жөн. Дәрігер атап өткендей, көзге арналған жаттығулар Желіде көп болуы мүмкін, бірақ ең қарапайым әдістердің бірі – белгілі бір нүктеге мұқият назар аудару, содан кейін бір жаққа қарап өту. Бұл жаттығуды бірнеше рет қайталауға болады», — деп түйіндеді Жібек Тажидинова.
Discussion about this post