Алматыда дәрігер 11 жастағы бала зорланғанын мәлімдеді

Алматыда емдеу мекемелерінің бірінің дәрігері 11 жастағы баланың зорланғанын мәлімдеді. Ақпаратты «НеМолчиKz» қоғамдық қорының өкілдері айтты, деп хабарлайды Qazaqpress Tengrinews.kz-ке сілтеме жасап.

Қоғам белсенділерінің айтуынша, зардап шеккен бала туысымен бірге дәрігерге келген.

«Дәрігер қарап, оның бірнеше рет зорланғанын түсінген. Балаға хирургиялық көмек қажет. Бұл оқиғаның егжей-тегжейін әзірге ашпаймын, бірақ ол адам шошитын жайт», — деп жазды қор басшысы Дина Таңсәрі.

Полицейлер мұндай факт шынымен де тіркелгенін растады. Іс Қылмыстық кодекстің 121-бабы 4-бөлігі бойынша тергеліп жатыр. Тергеу амалдарын Медеу ауданының полицейлері жүргізіп жатыр.

«Тергеу барысында қажетті сараптамалық зерттеулер жүргізіліп, істің шынайы мән-жайы анықталады. Баға беріліп, факт расталған жағдайда заңға сәйкес шаралар қабылданады», — деді Алматы қалалық Полиция департаментінің баспасөз қызметі өкілдері.