Зерттеу нәтижесінде бір жыл ішінде тұрмыстық техника 18%-ке қымбаттағаны анықталды. Сонымен қатар, қазақстандық отбасыларда қандай тұрмыстық техника жиі кездесетіні анықталды, деп хабарлайды Qazaqpress Bizmedia.kz-ке сілтеме жасап.
Қазақстандық отбасыда қандай тұрмыс техникалары бар?
ҚР BNS ASPIR сауалнамасы мен Energyprom.kz зерттеуі бойынша, 2021 жылы қазақстандықтардың 100%-і пешпен, 99,7%-і тоңазытқышпен, 96,1%-і кір жуғыш машинасымен, 94,1% – шаңсорғышмен, 79,1% – микротолқынды пешпен қамтамасыз етілген.
Ал қосалқы тұрмыстық техникамен қамтамасыз етілу төменлеу: мұздатқыш – 29,6%, мультипісіргіш – небәрі 28%, тігін машинасы – 27,9%, кондиционер – 24,1%, жылытқыш – 18,5%, ыдыс жуғыш машина – 3,4%-і ғана бар.
2021 жылы сауалнамаға Қазақстанның барлық өңірлерінен 11,7 мың отбасы қатысты.
Қалада тұратын халықтың кір жуғыш машина, шаңсорғыш, микротолқынды пеш, мультипісіргіш, кондиционер, жылытқыш, ыдыс жуғыш машина сияқты тұрмыстық техникамен қамтамасыз етілу деңгейі ауыл тұрғындарына қарағанда жоғары.
Сонымен қатар, ауыл тұрғындарының тоңазытқышпен, мұздатқышпен, тігін машинасымен қамтамасыздығы керісінше, қала тұрғындарынан жоғары.
Елдегі 100 үйге орта есеппен 102 тоңазытқыш, 102 пеш, 97 кір жуғыш, 95 шаңсорғыш, 79 микротолқынды пеш, 30 мұздатқыш, 28 тігін машинасы, 28 мультипісіргіш, 26 кондиционер, 20 жылытқыш, 4 ыдыс жуғыш машинадан келеді.
Қазақстандағы тұрмыстық техниканың басым бөлігі импортпен келген. Биылғы жылдың бірінші тоқсанының қорытындысы бойынша, Қазақстанда небәрі 322 тұрмыстық тоңазытқыш пен мұздатқыш өндірілген. Бұл ретте сектордағы импорт саны 144,9 мыңды құрады.
Сонымен қатар, бірінші кварталда Қазақстан Республикасына 150,8 мың кір жуғыш машиналар мен киім кептіруге арналған машиналар, 89,1 мың тұрмыстық шаңсорғыштар, 181,9 мың араластырғыштар, ұсақтағыштар мен шырын сыққыштар және т.б. жеткізілді, олар Қазақстанда өндірілмейді.
Инфляция жүгін әсіресе Алматы облысының тұрғындары сезді. Жылдық көрсеткіш бойынша 21,5% құрады. Инфляциядан зардап шеккендердің ішіне Жамбыл (жылына плюс 20,7%) және Солтүстік Қазақстан (плюс 20%) облыстары да кірді.
Тұрмыстық техниканың ішінде тоңазытқыштар мен мұздатқыштар – 15,8%-ке, пештер – 17,2%-ке, кір жуғыш машиналар мен ыдыс жуғыштар – 22%-ке, шаңсорғыштар – 25,1%-ке қымбаттады.
Ұлттық статистика бюросының мәлімдемесінде 2022 жылдың сәуірінде Қазақстанда жылдық инфляция деңгейі 13,2% процентті, бір айда 2 пайызды құрады, ал жыл басынан бері инфляция 7,3 процентті құрағаны хабарланған.
Тағы айта кетелік, Баға статистикасы департаментінің директоры Қуанышбек Жақыпбекұлы биылғы жылдың басынан бері индекс құрылымында азық-түлік тауарлары 40,7 процентті, азық-түлікке жатпайтын тауарлар 30,2 процентті, ақылы қызметтер 29,1 процентті құрайтынын айтты.
Оның айтуынша, тұрғын үй коммуналдық қызметтер бағасы да өсімі байқалады. Бір жылда электр энергиясы 10,6 процентке, қоқыс шығару 7,8 процентке, тарату желілері арқылы тасымалданатын газ 3,2 процентке қымбаттады.
Сіз жаңалықтар туралы не ойлайсыз