Мұғалімдердің осы жылғы жалақысы қанша теңге болатыны анықталды, деп хабарлайды Qazaqpress Bizmedia.kz-ке сілтеме жасап.
Кадр тапшылығы бар өңірлерге жіберілетін үздік мұғалімдердің жалақысы көтеріледі, деп хабарлады Білім және ғылым министрі Асхат Аймағамбетов.
Мәжілістің жалпы отырысында депутат Жәмиля Нұрманбетова министрден Атырау, Маңғыстау, Алматы және Түркістан облыстарына баратын мұғалімдерді ынталандыру шараларын қабылдауды өтінді.
«Ол үшін республикалық бюджетте 3,9 млрд теңге қарастырылған. Бұл сома мұғалімдердің жалақысын 150%-ке көтеруге ғана қарастырылған. Алайда, қолдау шараларына бағытталған бұдан басқа шығындарды көріп тұрған жоқпыз», — деді Жәмиля Нұрманбетова.
Білім министрлігінің басшысы биылғы жылдың қыркүйек айынан бастап кадр тапшылығы бар өңірлерге үздік мұғалімдерді жіберу бағдарламасы басталатынын мәлімдеді. Оның айтуынша, мемлекеттік Қордан бөлінуге қарастырылған 3,9 млрд теңгенің арқасында тек мұғалімдердің жалақысын көтеріп қана қоймай, тіпті жалға баспана алуына және коммуналдық төлемдерді өтеуіне қарастырылған.
«Заң бойынша тұрғын үй мен коммуналдық қызметтерді тек жергілікті бюджеттен төлей аламыз. Заңды бұзбау үшін бұл мәселені жалақы арқылы шешіп жатырмыз. Яғни, мәселен, проблемалық аймаққа көшетін мұғалім қыркүйек айында шамамен 790 мың теңге алады. Оның 140 мыңы коммуналдық шығындар болса, қалған 650 мыңы мұғалімнің жалақысы», – деді Асхат Аймағамбетов.
Мәжіліс спикері Ерлан Қошанов министрдің жауабы қосымша сұрақтар туғызатынын айтты.
«Неге тек төрт облыс таңдалды? Келген мұғалімдердің жүктемелері бірдей болғанымен, жергілікті мұғалімдерден екі есе көп алатыны наразылық пен әлеуметтік теңсіздікті тудырмай ма? Қоғамда осы сұрақ туындайды деп ойлаймын. Мұндағы түпкі мақсат қандай? Кадр тапшылығынан құтылу ма әлде білім сапасын арттыру ма?», – деп сұрады Қошанов.
Сонымен қатар, Қошанов мұғалімдердің бір аймақта өмірлерін құрып алған болса, басқа аймаққа көшуге дайын бола ала ма екен, соған да назар аударды.
«Екі мыңдай оқытылған мұғалім табылар ма екен?», – деп қосты Төменгі палата спикері.
Білім министрі әзірге дәл осы төрт облыста ғана ұстаз тапшы деп жауап берді. Оған қоса, оның айтуынша, еңбекақының бірдейі болмауы да резонанс тудырмайды.
«Қазірдің өзінде бір мектепте жұмыс істейтін мұғалімдердің жалақысы әртүрлі. Бұл тәжірибе мен біліктілікке байланысты. Мұндай ұстаз конкурстық іріктеуден өтіп, өңірлерге баратын болса, осындай жалақы алуға мүмкіндік бар екенін дәлелдейді», – деді Асхат Аймағамбетов.
Ол білім сапасын арттыру үшін бір мектепке бірнеше мықты мұғалімдер жіберілетінін айтты. Сондай-ақ министрдің сөзінше, басқармада мұғалімдерді басқа аймақтарға жіберу тәжірибесі бар екенін айтты.
«Өткен жылы Түркістан облысында Назарбаев зияткерлік мектебінің жаңа филиалы ашылғанда көп адам басқа өңірге қоныс аударды. Сол кезде біз онда да конкурс өткіздік, көшіп келгендердің арасында қазір осы мектепте жұмыс істеймін дегендер болды», – деп түйіндеді Білім және ғылым министрі.
ҚР-ның жағдайы нашар өңірлеріндегі мұғалімдерге қолайлы ортадағы жұмыс үшін не ұсынылмақ?
2022 жылдың 13 қаңтарында Білім министрі Асхат Аймағамбетов Facebook желісіндегі парақшасында сапалы мұғалімдерге кадр тапшылығы бар және білім беру саласында білім сапасы жағынан үлкен олқылықтары бар өңірлерде жұмыс істеуге келісуі үшін қандай шарттар ұсынылатынын айтты.
«Президенттің тапсырмасы бойынша біз осы өңірлерге үздік мұғалімдерді тарту үшін тиісті қолдау шаралар пакеті қарастырылған арнайы бағдарлама әзірлеп жатырмыз. Мұғалімдердің осы салаларда жұмыс істеуге мүдделі болуы үшін біз әлеуметтік қолдау, жалақының көтерілу коэффициентін белгілеу, баспанамен қамтамасыз ету немесе тұрғын үйді жалға алу құнын өтеу және коммуналдық төлемдердің шығынын мойынға алу сияқты шараларды ұсынып отырмыз», – деп жазды Білім және ғылым министрлігі.
Бұл әлеуметтік пакет белгілі бір критерийлерге сай келетін және нақты мектептерге жұмысқа баратын мұғалімдерге ғана беріледі. Министр кейбір мәліметтер әлі талқыланып жатқанын ескертті.
Сондай-ақ Асхат Аймағамбетов қызметтік борышын өтеу кезінде қаза тапқан әскери қызметкерлердің, құқық қорғау және арнаулы мемлекеттік органдар қызметкерлерінің балаларына жоғары оқу орындары мен колледждерде білім алу үшін грант бөлу туралы ереже қабылдауды жоспарлап жатқанын айтты. Министрлік Қазақстанда шетелдік университеттердің бес филиалын ашу жұмыстарын бастады. Кейбір шетелдің үздік ЖОО-ның филиалдарын ашу туралы келіссөздер басталды.
«Бұл шара басқалармен қатар отандық ЖОО арасындағы бәсекелестікті жақсартады. Бұл бағыттағы жұмыстарды бастап кеткенімізді атап өтемін. 2021 жылдың қыркүйегінде Де Монфорт Лестер Британ университетінің филиалы ашылды. Сонымен қатар, Манаш Қозыбаев атындағы университетті Аризона университетінің институтының сенімгерлік басқаруына беру мәселесі пысықталуда. Еліміздің батыс өңірлеріндегі жастардың жоғары білім алуға қолжетімділігін арттыру үшін, онда екі үздік шетелдік техникалық университеттердің филиалдары ашылады», – деп жазды ол.
Министр қазірдің өзінде техникалық саладағы үздік ресейлік университеттің филиалын ашу жұмыстарын бастағанын айтты.
«Сонымен қатар білім сапасы нашар өңірлердің талапкерлері үшін техникалық бағыты бойынша қосымша гранттар бөлу жоспарлануда. Бұл мақсатты гранттар еліміздің жетекші жоғары оқу орындарында білім алуға бөлінетін болады. Онымен қоса, шарттардың біріне түлектерді негізгі тұрғылықты жері бойынша шоғырландыру талабы ұсынылмақ», – деді Білім және ғылым министрлігінің басшысы.
Ол биылғы жылы жоғары оқу орындарында техникалық мамандық бойынша грант санын көбейтетінін айтты.
Сіз жаңалықтар туралы не ойлайсыз