«1 қаңтарда газ бағасы 120 теңгеге дейін көтерілді. Жаңаөзен тұрғындарын газ бағасын 60 теңгеге дейін төмендету туралы үндеуге қосылуға шақырамын», – деп жазды митингке қатысушылардың бірі Серік Бақтыбайұлы Facebook парақшасында.
Наразылық білдірушілердің кейбірі көліктердің қозғалысын бөгеп, жолға шығыпты.
«Сағат 11.00-де Жаңаөзендегі АХАЖ маңына жиналған көлік иелері сұйытылған газ бағасын төмендету мәселесін талқылады. Жиналғандармен қала әкімінің міндетін атқарушы Ғалым Байжанов, қала әкімінің орынбасары Жаңабай Аймағамбетов және құқық қорғау органдарының өкілдері түсіндірме үдерісін жүргізді.
Жиналғандарға сұйытылған газды сату бойынша істің жай-күйі және «Бейбіт жиындар ұйымдастыру туралы» заңы түсіндірілді, атап айтқанда, олардың әрекеттерінің заңға қайшы екендігі, себебі жиналысқа 5 жұмыс күні қалғанда әкімдікке хабарлау керек», – деді департамент.
Газ бағасының жоғарылауына байланысты шерулер өтіп жатқан Жаңаөзен қаласына қауіпсіздік қызметкерлері келді, деп хабарлады Қазақ телеграф агенттігі.
«Ұлттық ұлан жауынгерлері мінген автобус Жетібай ауданында жүріп жатыр, мен оларды өз көзіммен көрдім – «Урал» көлігінде», – делінген хабарламада.
Сонымен қатар баспасөздің хабарлауынша, Маңғыстау облысының аудан орталығы Ақтауға әскери-көлік ұшақтары келген екен.
Бұған дейін Қазақстан билігі шерулер кезінде газ құнын төмендетуден бас тартқан болатын.
1 қаңтардан бастап елімізде газдың литрі 60 теңгеден 120 теңгеге дейін өсті. 2 қаңтарда Жаңаөзен қаласының (Маңғыстау облысы, Қазақстанның оңтүстік-батысы) тұрғындары жанармай бағасын төмендетуді талап етіп шеруге шықты. Тіпті, жергілікті жанармай құю бекеттерінің кейбір иелерінің өзі бағаны литріне 85-90 теңгеге дейін төмендетті.
Маңғыстау облысының Ақтау қаласында да наразылықтар жалғасуда. Халық облыс әкімдігі ғимаратының алдына шығып, газ бағасын литріне 50 теңгеге дейін түсіруді талап етті. Шеру өтіп жатқан аумақта белгісіз себептермен электр қуаты өшіп қалды, мәселені шешу үшін мамандар тартылды.
Онымен қоса Алматы қаласындағы бір жанармай құю бекетінің маңайына наразылық білдірушілер жиналды, деп хабарлады Sputnik Қазақстан Telegram-арнасы.
Талап етушілер автогаздың бір литрін Маңғыстау облысындағыдай 50 теңгеден (8,45 рубль) сатуды талап етті.
3 қаңтарда Жаңаөзендегі талап етушілер саяси талаптарды да алға тарта бастады және бірнеше күн қатарынан түнеп жүр. Басқа қалалар да жаңаөзендіктермен келісетіні байқалады. Дүйсенбіге қараған түні президент Қасым-Жомарт Тоқаев Twitter-де үкіметке «Жаңаөзендегі жағдайды шұғыл қарауды» тапсырғанын жазды. Үкімет газ бағасы литріне 120 теңгеден 85-90 теңгеге дейін төмендейтінін айтты.
4 қаңтар күні Ақтауда наразылар шатыр мен киіз үй тігіп, алаңға жүздеген адам жиналды. Оның үстіне көршілес облыс Ақтөбе, Орал, Шымкент қалаларының тұрғындары да келгені хабарланды. Ал What’s App және т.б. әлеуметтік желілерде елорда тұрғындары да Маңғыстаудағы шеруге шыққандарды қолдайтыны жайлы бейне-жарияланым тарап отыр.
Сол күні Діни Youtube арнасының жүргізушісі Ардақ Байғабыл тікелей эфирде қазақстандықтарды сабырлыққа шақырып, өз пікірімен бөлісті.
«Жалпы, халықтың назы дұрыс, өйткені ол менің де назым. Менің де ойым. Менің де талабым. Менің де бала-шағам бар. Маған да бүкіл Қазақ елінде болып жатқан қымбатшылық ауыр тиіп жатыр. Мен қарапайым адаммын, сіздер, бәріміз бірдейміз. Бір нәрсені түсініңіздер ағайын! Сыртқы күштер бар осындай нәрсені қолданып қалад. Сосын сіздер білесіздер арты қандай болатынын. Қырғызстан, Украина тағы да басқа елдерді айтпай-ақ қояйын. Ең бастысы қазаққа, халқыма мына көшеге шығып жатқан, митинг жасап жатқан халқыма айтарым: көп жағдайда салқынқандылық танытыңыздар! Провакационный нәрселерге бой ұрмаңыздар! Арақ ішіп, мас боп, талан-таражғысып от шашып, сондай нәрсе жасамасаңыздар дұрыс. Билікке айтырым: халыққа оқ атпаңыздар! Ол – халқымыз. Бәріміз бірміз. Халық пен билік – бір нәрсе…»
Сіз жаңалықтар туралы не ойлайсыз