Желтоқсан айында WhatsApp әлеуметтік желісінде «кредит рақымшылық» жайында аудио-фейк тарай бастады, деп хабарлайды Qazaqpress.
Естуіміз бойынша, Ұлттық банк қазақстандықтарға барлық несиелерін кешіріп жатқан көрінеді. Алайда ғаламтор кеңістігі мен ұлттық арналарда бұл туралы мәлімет жоқ. Еске сала кетейік, 2021 жылдың мамыр айында Instagram әлеуметтік желісінде де осыған ұқсас «Қазақстандағы барлық несие мен қарыздарды кешіру!» атты видео-фейк тараған болатын. Онда Қазақстан Республикасының Президенті Қасым-Жомарт Тоқаев Қазақстан азаматтарының барлық несиелері мен қарыздарын есептен шығару туралы жарлыққа қол қойғаны туралы айтылған. Бірақ көп ұзамай Мемлекет басшысының баспасөз хатшысы Берік Уәли бұл ақпаратты жоққа шығарып, пікірімен бөліскен болатын. Онымен қоса, 2019 жылы Мемлекет басшысының тапсырмасы бойынша кепілсіз тұтынушылық несиелер бойынша қарызды өтеу түріндегі әлеуметтік көмек көрсетілген еді, бірақ бұл көмек бір реттік қана екенін айтты.
«Қасым-Жомарт Кемелұлы айтқандай, бұл көмек акциясы бір реттік көмек түрінде қарастырылған және енді соған ұқсас ондай жәрдемдесу акциялары жүзеге асырылмайды. Осылайша, Қазақстанда жоспарланған несиелерді есептен шығару туралы бейне-таспадағы жарияланған деректер шындыққа сәйкес келмейді. Қазақстандықтарды түрлі фейктерге сенбей, тек ресми хабарламаларға құлақ асуын өтінеміз», – деді Берік Уәли.
Бір реттік көмек акциясы 2019 жылдың жазында іске асырылды және сол жылы Informburo.kz нақты кімге және қандай жағдайда несиелер кешірілетіні жайлы түсіндірме ақпарат жариялады.
2020 жылдың 3 тамызында WhatsApp желі қызметінің жеке блогында пайдаланушыларды платформадағы жалған ақпарат ағынынан қорғауға арналған қызметке тағы бір функция қосқанын жариялаған еді.
«Интернеттен іздеу» жаңа функциясы бірнеше чаттарға бірнеше рет жіберілген хабарламаларға әсер етеді. Олар арнайы қос галочка белгісімен белгіленеді, бұл мәтіннің түпнұсқа авторы хабарламаны жіберген пайдаланушы емес екенін көрсетеді.
«Мұндай жиі қайталанатын хабарларды іздеудің тәсілі желі қолданушыларға мәтін үзінділерін жаңалықтар арналарынан немесе басқа да ақпарат көздерінен ұқсастықтарды табуға көмектеседі», – делінген хабарламада.
Бұдан бұрын WhatsApp желісі қайта жіберілген хабарламаларды бір уақытта тарату мүмкіндігін 5 чатқа шектеген болатын. Олардың айтуынша, шектеудің арқасында спам-таралымдардың санын 25%-ке азайыпты.
Дегенмен күннен күнге фейк ақпараттар жаңарып, оған қарсы күрес тәсілдерінің өзектілігі де өше береді. Енді WhatsApp желісінде тек мәтін ғана емес, аудио-фейктердің де таралуы жиілеп кетті.
Сіз жаңалықтар туралы не ойлайсыз