10 қазан күні Алматы қаласында диссидент Арон Атабектің орыс тілінде жазған «Поэт-бунтарь, казахский самурай» (Асау ақын, қазақ самурайы) атты шығармалар жинағы жарық көрді, деп хабарлайды Qazaqpress Azattyq-қа сілтеме жасап.
Шара ұйымдастырушыларының айтуынша, кітап тіркелмеген «Атажұрт» қозғалысының қолдауымен 500 дана болып шыққан – деп хабарлады Azattyq. Кітап жеке қаржыға шығарылған, ал кітапты таныстырғандар сатылымнан түскен қаражат мерзімінен ерте босаған Арон Атабекті қолдау ретінде қарындасы Разия Нутушеваның есеп-шотына аударылатынын айтты.
Әлеуметтік желілерде Арон Атабек жайлы түрлі пікірлер бар. Сотталарға дейін және түрмедегі жазған туындылары орыс тілінде жеке сайтында жарияланған еді. Сайтқа кіріп, Аронның туындыларымен танысқандар жазуларын өнерге жатқызбайтынын айтты. Желі қолданушыларының пайымдауынша, өлеңдерінде тұрпайы сөздер мен жеңілдің үстімен жазылған біржақтылы ойлар да жиі айтылады екен.
Алайда таныстырылым кезінде Арон Шаңырақ, Отан, халық жайлы ой толғап, Қазақстандағы «жекешелендіру ұранымен халық игілігін талан-таражға салған биліктің диктатура орнатып, мәңгі билеп-төстегісі келетінін сынаған» деп айтқан болатын.
Сонымен қатар 2006 ж. Шаңырақ оқиғасына байланысты Аронды жақтайтындар да бар. Еске сала кетейік, 1990 жылы тіркелмеген «Алаш» қозғалысының төрағасы болып, Әйгерім, Шаңырақ, Бақай, Ұлжан шағын аудандарында тұратын азаматтар мен қаладағы жатақханадан қуылған адамдардың құқығын қорғайтын қозғалысын бастаған.
Шаңырақ шағын ауданы 2000 жылы Алматының солтүстік-батыс жағалауында пайда болды. Бұл жерге елдің депрессивті аудандарынан азаматтар жақсы өмір іздеп, жаппай көшіп келіп отырды. Тіпті кей кезде жерді заңсыз иемденгендер де болды.
2008 ж. жаңа Алатау ауданы құрылғанға дейін Шаңырақ шағын ауданында коммуникация, электр-қуаты, су, газбен қамтамасыз ету және т.б. цивилизациялық қажеттіліктер қарастырылмағантын. 2006 жылы қала әкімдігі Алматылық соттан Шаңырақ ауданында заңсыз құрылған үйлердің бұзылуын талап етіп, шағымданды. Ал «14 шілдеде полиция қызметкерлері заңсыз құрылған үйлерде қоныстанған адамдарды үйлерін босатуын сұрауға келген. Тұрғындар үйлерін тастап кеткісі келмей, қарсылық білдірді. Кейін жаппай тәртіпсіздік басталды. Қақтығыс барысында біреу полицейдің үстіне бензин құйып, өртеп жіберді» деп хабарлады masa.media.kz.
Арон Атабек пен бірнеше жергілікті тұрғын Құрманғазы Өтегенов, Ерқанат Тараншиев, Рүстем Тұяқов «Шаңырақ» шағын ауданында ҚР Құқық кодексінің 261 бап «тұтқындау», 99 бап «кісі өлтіру» және 272 бап «жаппай тәртіпсіздіктер» баптары бойынша айып тағылып, Арон Атабек 18, Құрманғазы Өтегенов 16, Ерқанат Тараншиев 15, Рүстем Тұяқов 14 жылға бас бостандығынан айырылды. Бірақ полиция қызметкерінің өліміне Арон Атабектің қатысы бар екені әлі дәлелденген жоқ.
Алматы қалалық сотының 2008 жылғы 5 қазандағы үкімі бойынша Атабектің 18 жылдық қатаң тәртіптегі бас бостандығынан айыру мерзімінің басталуы – 2006 жылдың 17 шілдесі, аяқталуы – 2024 жылдың 16 шілдесі. Қазіргі таңда жазасының 15 жылын өтеп, 2021 жылдың 1 қазанында түрмеден мұқият бақылау шартымен босатылды.
Сіз жаңалықтар туралы не ойлайсыз