Күллі әлемге танылған ғажайып дауыс иесі Димаш Құдайберген екі жылдан соң Қытайға оралғанын мәлімдеді, деп хабарлайды Qazaqpress Nur.kz-ке сілтеме жасап.
Өнер иесі халықаралық аренада шығармашылығын барынша дамытпақ.
Эстрада жұлдызы Қытайда бірқатар жоспарларын іске асыруды мақсат етіп отыр және өзінің Instagram парақшасында бұл күнді екі жыл бойы асыға күткенін хабарлаған болатын.
– Достар сіздермен жаңалығыммен бөліскім келіп отыр. Араға екі жыл салып, әлемдік шоу-бизнестегі жұмысымды жалғастыру мақсатында мен Қытайға қайта оралдым. Халықаралық карантин кесірінен біз бұл кездесуді екі жыл бойы күттік. Мен бір ай оқшауланып жаттым. Сол аралықта көптеген жоспарларды дайындап қойдым. Олардың барлығын біз командамызбен бірге Қытайға іске асыратын боламыз.
Мен әлемнің барлық елдеріндегі түрлі концерттік шаралары және телевизиялық жобаларына қатысатын боламын (ол елдерде карантин салдарынан концерттерге тыйым болмаса). Әлемдегі карантин менің жоспарларымды айтарлықтай өзгертті. Алайда, осы сәттен бастап мен сіздерді өз шығармашылығыммен одан бетер қуантатын боламын. Сіздерді жақсы көремін – деп жазды ол.
Өнер иесінің жанкүйерлері әншіге қолдау білдіріп, оған сәттілік тіледі. Олар Димаштан жаңа әндерді асыға күтетіндерін айтты.
Сіз жаңалықтар туралы не ойлайсыз