Шымкентте есірткі жарнамасы жер жарып тұр. Көшеде ілінген жарнамаларда апта сайын 300 мың теңге табуға болады деген жарияланымдар бар, деп хабарлайды Qazaqpress Tengrinews.kz-ке сілтеме жасап.
Құқық қорғаушы Евгений Яворский оның артында есірткі саудасы жатыр деп пайымдайды. Көшеден «жақсы жалақы береміз» деген жарнаманы көрген құқық қорғаушы бірден көңіліне күдік ұялағанын айтты. Оған жұмыс ұсынушылардың жалақыны теңгемен емес, рубльмен ұсынғаны әрі байланыс нөміріне жат елдің коды жазылғаны бірден ұнамады. Ал номерді WhatsApp арқылы тексергенде, тұтқаның ар жағында есірткі тасымалымен айналысу керектігін айтты.
– Бірден «есірткі тасымалдайсыз» деп жазды. Яғни «біз нұсқаған жерге барып, пакетке оралған есірткіні аласыз да, дозаларға бөліп, айтылған орындарға жеткізесіз» дейді. Ал кепілдеме ретінде сіздің тұрғылықты мекенжайыңыз бен фотоңыз ғана керек екен. Есесіне аптасына, кем дегенде 300 мың теңге төлеп тұруға уәде береді. Ал мұндай ақша біздің өңірге нағыз батпан құйрық – деді құқық қорғаушы.
Құқық қорғаушы полиция қызметкерлерінің бейқамдығына наразы болды. Оған қоса ол есірткімен күрес басқармасының басшысына хабарласты. Бірақ, полиция қызметкерлері құқық қорғаушыға бұл іс жүргізіліп жатқанын айтты.
– Полицейлер жарнамаға сеніп есірткі тасығандарды ғана емес, кім және қандай көлемде әкеліп жатыр, мұның бәрін ұйымдастырғандарды ұстауы керек қой. Көрсетілген телефон нөмірі Ресейдікі болса, сол елдің құзырлы орындарына шықсын. Тәжірбиелі мамандарға мұндай қылмысты ашу аса қиын емес. Мұның жолын кеспесе, жүздеген, мыңдаған отбасы зардап шегері анық – деді Абай АПБ бастығының орынбасары Керімбек Сейдуәлиев.
Әзірге Шымкентте есірткі саудасымен кім айналысатыны белгісіз. Полиция қызметкерлері де бейхабар. Құқық қорғаушы жарнамаға алданған жастар есірткі курьеріне айналып жатқанын айтты. Бұлай жалғаса беретін болса, Шымкент нашақорлар қаласына айналуы мүмкін деп пайымдайды Құқық қорғаушы.
Сіз жаңалықтар туралы не ойлайсыз