Ras Aitamyn бұған дейін Нұр-Сұлтан қаласының әкімдігі «Мир» мемлекетаралық арнасының Қазақстандағы филиалына әкім Көлгіновтің қызметін көрсетуге қанша ақша төлейтінін жазған, деп хабарлайды Qazaqpress.
Бүгін әкімдіктен тендер алған басқа БАҚ Көлгіновтің қызметін қалай насихаттайтынына тоқталамыз.
Нұр-Сұлтан қаласының әкімдігі ең үлкен сомадағы келісімшартты өзіне қарасты Elorda Aqparat ЖШС-мен жасасты. Биыл 381 млн теңгеден артық сомаға 4 келісімшарт жасалған.
Сонымен қатар әкімдік Nur Otan партиясына қарайтын Nur Media ЖШС-мен 210 млн теңгеге келісімшарт жасасты. Бұл холдингке «Астана» телеарнасы, «Aiqyn», «Литер», «Tύrkistan», «Қазақстан теміржолшысы» газеттері және «NS», «Orda FM» радиолары кіреді. Осы тізімде аты аталған кей ақпарат құралдарымен әкімдіктің жеке келісімшарттары да бар. Мысалы, әкімдік биыл «Айқын-Литер» ЖШС-мен 5 млн теңгеге, «Астана» арнасының меншік иесімен 79 млн теңгеге келісімшарт жасасты.
Нұр-Сұлтан қаласының әкімдігі 2021 жылдың мамырында «Время» газетінің меншік иесімен 8 млн теңгеге екі келісімшарт жасасты. Осы мемлекеттік тапсырыс есебінен шыққан материалдар арасында әкім Алтай Көлгіновтің қызметін насихаттайтын материалдар баршылық.
Әкім Алтай Көлгіновтің инвестициялар жөніндегі аймақтық үйлестіру кеңесінде астанада алты зауыт пен фабрика салу мақұлдағанын хабарлаған материалға 415 мың теңге төленді. Құрылысты аралап жүрген Көлгіновтің суреті мақаланың басында және ішінде жүр.
2021 жылы астанада 3 млн шаршы метр тұрғын үй салынатынын хабарлаған ақпаратқа 228 мың теңге төленді.
Көлгінов келгелі астанада тұрғын үй құрылысы қаптап, бос тұрған аумақты көппәтерлі үйлер басып жатыр. Бұған, әрине, кей тұрғындар наразы. Сол жағалаудағы үшауысымды мектеп жанына BI құрылыс компаниясына тұрғын үйлерді салуға рұқсат берген әкімдікке наразы тұрғындар түрлі флешмобтар өткізіп, әкімді шақырған. Қызығы, «Время» басылымы да бұл мәселе туралы жазған. Кейін әкімдік кінәсін жуып-шайғандай болып, алдағы бес жылда 65 мектеп салынатынын хабарлады. Әкім Көлгіновтің осы сөзін берген ақпарат үшін «Время» газетіне 208 мың теңге төленді.
Әкімдік пандемия басталғалы елдегі ең ірі порталдардың бірі – Tengrinews.kz-тің меншік иесімен 98,6 млн теңгеге (38,6 млн теңге – 2021 жылы, 60 млн теңге – в 2020 жылы) келісімшарттар жасасты.
Ал Nur.kz порталының меншік иесімен 138,7 млн теңгеге келісімшарттар жасасты. Соңғы келісімшарт тамыз айында 40,1 млн теңге сомаға жасалған.
Ал Zakon порталының меншік иесімен биыл 34 млн теңгеге екі келісімшарт жасасты.
Әлбетте, осы келісімшарт бойынша материалдардың бәрі әкім пиарына арналмайды. Бірақ жарық көрген материалдардың арасында Көлгіновтің қызметін насихаттайтын мақалалар, әкім мәлімдемелері, тіпті Көлгіновтің Instagram-парақшасындағы посттарды көшіріп басқан материалдар бар. Мысалы, Көлгіновтің Instagram-да ұзақ жыл бойы салынып жатқан 50 нысанды аяқтап, пайдалануға береміз деген мәлімдемесін көшіріп басқаны үшін 223 мың теңге төленді.
Көлгіновтің жыл басынан бері қалада 50 заңсыз қоқыс орны жойылып, полигонға 37 мың тонна қалдық шығарылғаны жайлы Insta-постына негізделген ақпарат та ақылы болып шықты.
Әкімнің вакцинаның бірінші компонентін алғандар арасында пәтер ойнатылады деген Instagram-дағы жазбасын көшіріп басқаны үшін де бюджет ақшасы төленді.
Дәл «Время» басылымы тәрізді Zakon да «2021 жылы 3 млн шаршы метр тұрғын үй салынады» және «5 жылда 65-тен астам мектеп салынады» деген ақпараттар шығарды, оған бюджет ақшасы жұмсалды.
Көлгіновтің брифингіде астанада жемқорлықтың символына айналды делінетін LRT құрылысын аяқтау үшін 1 миллиард доллардай қаржы керек деген мәлімдемесі де ақылы болып шықты.
Әкімнің осы брифингіде биыл 15 ірі мектеп салынады деген мәлімдемесі мен оқушыларға вакцина салына ма деген сұраққа жауабына да бюджет ақшасы жұмсалды.
Zakon порталында шыққан осы ақпараттардың әрқайсысына 223 мың теңге төленді.
Пандемия басталғалы әкімдік Zakon.kz порталының меншік иесімен 61 млн теңгеге келісімшарттар жасасқан.
Сіз жаңалықтар туралы не ойлайсыз