Білім және ғылым министрі Асхат Аймағамбетов мектеп директорларын тағайындаудың жаңа тәртібі туралы мәлімдеді, деп хабарлайды Qazaqpress Nur.kz-ке сілтеме жасап.
Ведомство басшысының сөзінше, директорлар конкурс арқылы 5 жылға тағайындалады.
— Біріншіден, енді мектеп директорының міндетін атқарушысы болып үш айдан аспайтын және бір реттен артық емес мерзімде ғана істеуге болады. Осы кезеңде конкурс өткізіліп, жаңа басшы тағайындалуы керек.
Ережеде белгіленгендей, мектеп директорының бос немесе уақытша бос лауазымына конкурс туралы хабарландыру бос орын пайда болғаннан кейін жеті жұмыс күні ішінде білім басқармасының ресми сайтында және аккаунтында орналастырылуы керек.
Осылайша, бос немесе уақытша бос директор лауазымына конкурс жарияламай ақ, жылдар бойы директордың міндетін атқарушысы болып жұмыс істеп жүре беруге енді жол берілмейді – деп жазды министр Facebook парақшасында.
Министрдің айтуынша, қазіргі таңда елімізде мектеп басшысы лауазымына 700-ден астам бос жұмыс орындарында директордың міндетін атқарушы адамдар жұмыс істейді.
— Екіншіден, ережеде директордың уақытша бос лауазымына (бала күтіміне байланысты демалыс, оқу және т.б.) тағайындау регламенттелетін болады. Мұндай жағдайларда да ұйым басшысы тікелей тағайындау емес, конкурс арқылы анықталатын болады.
Үшіншіден, енді директор лауазымына конкурсты аудандық білім бөлімдері емес, облыстық білім басқармалары өткізетін болады. Яғни, конкурстық рәсімдерді ұйымдастырады және директорларды анықтайды. Содан кейін директордың кандидатурасы бойынша құжаттар еңбек шартын жасасу үшін білім бөліміне жіберіледі. 5 жылға тағайындалады – деді министр.
Байқаудың өзі бірнеше кезеңнен тұрады:
- кандидаттардың директор лауазымына құжаттарды тапсыру;
- білім басқармасындағы кадр қызметі кандидаттың біліктілік талаптарына сәйкестігін бағалау, конкурсқа қатысуға рұқсат беру;
- үміткерлерге арналған электрондық тестілеу (басқарушылық құзыреттер, педагогика, психология, ҚР Заңнамасы бойынша емтихан);
- емтиханды сәтті тапсырса, оқу орнының Қамқоршылық кеңесінің алдында мектептің даму жоспарын қорғау;
- Білім басқармасындағы әңгімелесу (Қамқоршылық кеңесінің алдында мектептің даму жоспарын сәтті қорғап шыққан үміткерлер жіберіледі).
Айта кетелік, Қамқоршылық кеңесінің құрамына ата-аналар, педагогика саласының еңбек ардагерлері, қоғам қайраткерлері, үкіметтік емес ұйымдардың өкілдері кіреді. Білім бөлімі барлық кезеңнен өткен үміткермен тиісті еңбек шартын жасап, оны директор етіп тағайындау туралы бұйрық шығарады. Сонымен қатар Аймағамбетов болашақ директорларға қойылатын біліктілік талаптары туралы айтты.
- Біріншіден, болашақ директорлар міндетті түрде менеджмент курстарынан өтіп, тиісті сертификаттары болуы керек.
- Екіншіден, директор лауазымына басшы ретінде жұмыс өтілі бар кәсіби мұғалімдер тағайындалуы мүмкін, ал жалпы педагогикалық жұмыс өтілі кемінде 5 жыл болуы қажет.
- Үшіншіден, үміткер тағайындалғанға дейін соңғы екі жыл білім беру саласында жұмыс істеуі тиіс.
- Төртіншіден, тағы бір жаңашылдық — кадр резервін құру. Алғашқы екі кезеңнен сәтті өткен, бірақ білім басқармасында әңгімелесуден өтпеген үміткерлер бір жылға резервке алынуы мүмкін. Бұл үміткерлерге мектептің Қамқоршылық кеңесімен келісе отырып, бір жыл ішінде директор лауазымына тағайындалу құқығын береді.
- Бесіншіден, биылдан бастап директорларды ротациялау институты енгізілетін болады.
— Директорларды тағайындау рәсімдері мен оларды материалдық қолдау жөніндегі осы өзгерістің барлығы директор лауазымына лайықты, барынша даярланған кандидаттарды таңдауға және білім беру ұйымдары басшыларының бәсекеге қабілеттілігін арттыруға бағытталған. Сайып келгенде, бұл – білім беру сапасына әсер етеді – деп қорытындылады министр.
Сіз жаңалықтар туралы не ойлайсыз