Елімізде жеке куәліксіз өмір сүріп жүрген 4686 адам анықталды, деп хабарлайды Qazaqpress ҚазАқпаратқа сілтеме жасап.
«Біздің министрлік өткен жылдың қазан айынан бастап Үкіметтік емес ұйымдар, адам құқығы және заңдылықты сақтау туралы халықаралық бюро және «Сезім – әйелдер бастамасы» құқық орталығымен бірлесіп, ел аумағында жеке құжатсыз жүрген азаматтарды анықтау мақсатында кең ауқымды акция ұйымдастырды. Акцияның нәтижесінде Қазақстанда құжатсыз 4686 адам анықталды. Олар негізінен Алматы, Қарағанды, Түркістан, Ақмола және Жамбыл облыстарында тұрған. Бүгінде құжатсыз осы азаматтардың 3408-не жеке куәлік берілді. Ал қалған 1278 адамды құжаттандыру жұмысы жүріп жатыр», — деді ҚР ІІМ Көші-қон комитеті төрағасының орынбасары Сабыржан Сейітжанов Орталық коммуникациялар қызметінде өткен баспасөз мәслихатында.
Сондай-ақ, Көші-қон комитетінің өкілі құжатсыз жүргендерге жеке куәлікті қалай алуға болатындығы туралы кеңесімен бөлісті.
«Адамдар өмірдегі түрлі жағдайлардың салдарынан құжатсыз қалуы мүмкін. Қандай жағдайда болмасын кез келген адамның жеке куәлігі болуы тиіс. Онсыз ешқандай көмек, қолдау ала алмайды, тіпті жұмысқа да тұра алмайды. Демек, құжатсыз адам не істеу керек? Еліміздің барлық аймағында Көші-қон комитетінің бөлімшелері бар. Алдымен сол жерге барып, азамат өзінің құжатсыз жүргенін айту керек. Сол жердегі мамандар ол азаматтың мәртебесін анықтап, уақытша құжат бере алады. Содан соң азаматқа қатысты толық жағдай анықталып, оның неліктен құжатсыз жүргені анықталған соң ресми түрде Қазақстанның азаматы екенін дәлелдейтін жеке куәлік беріледі», — дейді ол.
Сіз жаңалықтар туралы не ойлайсыз