Алматы облысында бокс жаттықтырушысы 16 жастағы оқушыны ұрды, деп хабарлайды Qazaqpress Tengrinews.kz-ке сілтеме жасап.
Ведомство хабарына қарағанда, 26 қаңтарда Еңбекшіқазақ аудандық полиция бөлімінің кезекші бөліміне ауруханаға «мұрын сүйектері жарақаты» диагнозымен жасөспірім келгені туралы хабарлама түскен. Аталған факт бойынша Қазақстан Республикасы Қылмыстық кодексінің 107-бабы 2-бөлігі «Денсаулыққа қасақана орташа ауырлықтағы зиян келтіру» бабы бойынша сотқа дейінгі тергеу басталды.
«Жедел іздестіру іс-шараларының нәтижесінде Еңбекшіқазақ аудандық полиция бөлімінің қызметкерлері осы қылмыстық құқық бұзушылық жасады деген күдікпен жәбірленушінің 34 жастағы жаттықтырушысын анықтады. Ол өзі бокс бапкері болып жұмыс істейтін спорт залды тазалап жатқанда қасына оқушыларының сыныптасы келгенін айтты. Онымен әңгімелесу кезінде оқушы дөрекі сөйлесе бастаған, содан кейін жаттықтырушы шыдай алмай, оның бетінен ұрған. Қазақстан Республикасы Қлымыстық іс жүргізу кодексінің 201-бабына сәйкес басқа ақпарат тергеу мүддесі үшін жария етілмейді», — деді Еңбекшіқазақ аудандық ПБ басшысы Талғат Сейілханов.
Сіз жаңалықтар туралы не ойлайсыз