Атырауда жаппай төбелес кезінде қаза болған грэпплингтен әлем чемпионы Есенбек Сиғуатовтың туыстары тергеу ісі баяу жүріп жатқанын айтты, деп хабарлайды «Ақ Жайық».
Туыстарының айтуынша, осы іске байланысты тергеліп жатқан екі адам су полициясының қызметкері, алайда бұдан бұрын ПД полицияның бұған еш қатысы жоқ екенін растаған болатын.
Қайғылы оқиға 9 тамызға қараған түні қала маңындағы Дамба және Құрманғазы ауылдарының жігіттері арасындағы төбелес кезінде болған. Оқ танымал спортшының жүрегіне тиген.
«Ұлымның қайтыс болғанына үш ай болды, ал тергеу өте баяу жүріп жатыр. Осы іс бойынша екі адам қамауға алынды. Бірі менің ұлыма оқ атқан, ал екіншісі оқиға орнына қару әкелген. Алайда осы төбелесті ұйымдастырған 17 жастағы жігіт бостандықта жүр. Неге? Мен осы іс бойынша ІІМ-ге хабарласамын», – деді қайтыс болған баланың әкесі Тоқсанбай Оразғали.
«Біздің ауылдың балалары көрші ауыл Құрманғазыға барғанда сол ауылдың балалары оны ұрып-соғыпты. Балалар біздің баламызға және тағы басқаларына шағымданыпты. Содан Есенбек солармен бірге Құрманғазыға барған. Олар бастапқыда төбелескісі келмеген, тек жанжалға не себеп болғанын анықтамақ болған. Бірақ нәтижесінде Есенбекке оқ атылған. Сол түні мен намаз оқуға дайындалып жатқанмын, алайда бір сәтте Есенбектің достары үйге келіп, Есенбекке оқ атылғанын және оның қаза тапқанын айтты. Мен сенгім келген жоқ», – дейді ол.
Тоқсанбайдың айтуынша, қылмыс жасаған екі күдікті де су полициясында жұмыс жасаған екен.
«АЖ»-ға полиции департаментіндегілер былай деп жауап берді: «Бұл дерек бойынша сотқа дейінгі тергеп-тексеру жалғасып жатыр. Тағайындалған күрделі сараптамалар қорытындысы күтілуде. Іс бойынша тиісті сараптама қорытындысына сай шешім қабылданады».
Сіз жаңалықтар туралы не ойлайсыз